10 تامىز قازاق حالقىنىڭ ۇلى اقىنى، ويشىلى ءارى اعارتۋشىسى اباي قۇنانباي ۇلىنىڭ تۋعان كۇنىنە وراي الماتى قالاسىندا ءبىرقاتار رۋحاني-مادەني ءىس-شارالار ءوتىپ جاتىر. بۇگىن، 10 تامىزداعى مادەني-رۋحاني شارالار لەگى اباي ەسكەرتكىشىنە تاعزىم ەتىپ، گۇل شوقتارىن قويۋدان باستالدى. ءداستۇرلى شارا قالا ورتالىعىنداعى اباي الاڭىندا ۇيىمداستىرىلدى.
شاراعا زيالى قاۋىم وكىلدەرى، قالا اكىمدىگى، ءماسليحات دەپۋتاتتارى، قوعامدىق كەڭەس مۇشەلەرى، بەلسەندى جاستار مەن قالا تۇرعىندارى قاتىستى. جينالعان قاۋىم اقىن رۋحىنا تاعزىم ەتىپ، ەسكەرتكىشكە گۇل شوقتارىن قويدى.
شارا اياسىندا ن.تىلەندييەۆ اتىنداعى مەملەكەتتىك اكادەميالىق فولكلورلىق-ەتنوگرافيالىق «وتىرار سازى» وركەسترىنىڭ سۇيەمەلدەۋىمەن جينالعان جۇرت ۇلى ابايدىڭ رۋحى الدىندا باس ءيىپ، ونىڭ وشپەس مۇراسىن تاعى ءبىر ەسكە الۋ ماقساتىندا «كوزىمنىڭ قاراسى» ءانىن شىرقادى.
اباي قۇنانباي ۇلى – قازاق ادەبيەتى مەن رۋحانياتىنىڭ شامشىراعى. ونىڭ قالدىرعان مول مۇراسى مەن دانالىققا تولى وي-تولعاۋلارى بۇگىنگى قوعام ءۇشىن ءالى دە وزەكتى. بۇل كۇن – تەك اقىننىڭ تۋعان كۇنىن ەسكە الۋ عانا ەمەس، ۇلتتىڭ رۋحاني جاڭعىرۋىنا باعىتتالعان ماڭىزدى بەلەس.
"ابايدى تانۋىمىز جىل سايىن تەرەڭدەپ كەلەدى، ءبىز جىل سايىن ابايعا جاقىنداپ كەلە جاتىرمىز. 180 جىلدىق قازاقستاننىڭ تۇكپىر-تۇكپىرىندە، ونىڭ ىشىندە التىن شاھار – الماتىدا ايرىقشا اتالىپ جاتىر. ءبىز ابايدى تانىعان سايىن حالقىمىزدى تانىپ قانا قويماي، جۇرتىمىزدىڭ كەمشىلىگىن كورەمىز. بۇگىنگى الماتى قالاسىنىڭ اكىمدىگى سوعان جاعداي جاساپ وتىر. قۇرمەتتى قاۋىم، اباي تويى قۇتتى بولسىن، بۇل مەرەيتوي تارقاماسىن"، – دەدى جازۋشى، قازاقستاننىڭ ەڭبەك سىڭىرگەن قايراتكەرى سماعۇل ەلۋباي.
سايران جانتورەيەۆا، «گراند انا» توبىنىڭ جەتەكشىسى:
"بۇگىن كەرەمەت مەرەكە! اباي اتامىزدىڭ 180 جىلدىعىن تويلاپ جاتىرمىز. بۇل ءبىزدىڭ قاتىسىپ وتىرعان ءۇشىنشى ءىس-شارامىز. شارانىڭ ۇيىمداستىرىلۋى وتە جوعارى دەڭگەيدە! قازاق جاستارىنا ۇلگى بولۋ ءۇشىن بۇگىن مىنە، قازاقي ناقىشتا كيىندىك"، – دەدى.
قالا جۇرتشىلىعى بەلسەندى تۇردە اباي مەرەيتويىن اتاپ وتۋدە. بۇگىن اباي الاڭىنا 5000-عا جۋىق ادام جينالىپ، حاكىمنىڭ ءانىن شىرقادى. رۋحاني شارا ەلدىڭ ەڭسەسىن بيىكتەتىپ، اباي اماناتىن قايتا وي ەلەگىنەن وتكىزۋگە مۇمكىندىك بەرگەنى انىق.