766 «سەرگەك» اۆتوماتتاندىرىلعان باعدارلامالىق قامتاماسىز ەتۋ جۇيەسى جۇمىس ىستەيدى
الماتى قالالىق پوليسيا دەپارتامەنتىنىڭ اكىمشىلىك پوليسيا باسقارماسىنىڭ اعا ينسپەكتورى سامات ءابجاپاروۆ قالادا جول ەرەجەسىن بۇزعان كولىك جۇرگىزۋشىلەردەن ايىپپۇل ءوندىرۋ شارالارى تۋرالى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سپيكەردىڭ ايتۋىنشا، الماتىدا اۆتوماتتى رەجيمدە 766 «سەرگەك» اۆتوماتتاندىرىلعان باعدارلامالىق قامتاماسىز ەتۋ جۇيەسى جۇمىس ىستەيدى، بۇل دەگەنىڭىز - 5034 بەينەكامەرا. «ولار قالادا جىلدامدىقتى اسىرۋ، جول بەلگىلەرىن ەلەمەۋ، باعدارشامنىڭ تىيىم سالىنعان تۇسىنە ءوتۋ جانە قوعامدىق كولىككە ارنالعان جولاقپەن ءجۇرۋ سەكىلدى اكىمشىلىك قۇقىق بۇزۋشىلىقتاردى انىقتايدى. اتالعان قۇقىقبۇزۋشىلىقتار بويىنشا اكىمشىلىك نۇسقاۋلار اكىمشىلىك ءوندىرىستىڭ ءبىرىڭعاي ءتىزىلىمى وڭدەۋ ورتالىعىنىڭ دەرەكتەر بازاسىندا قالىپتاسادى. ودان سوڭ كولىك يەلەرىنە سمس-حابارلامالار جىبەرىلەدى. كولىك يەلەرى اكىمشىلىك ايىپپۇلدى 7 كۇن ىشىندە 50% جەڭىلدىكپەن تولەيدى. جەتى كۇننەن سوڭ ايىپپۇل 100% سوماعا اۋىستىرىلادى جانە 30 كۇن ىشىندە ەرىكتى تۇردە تولەنەدى. ق ر اقبتك-نىڭ 894-بابىنا سايكەس، 30 كۇن وتكەن سوڭ ماجبۇرلەپ تولەتۋ ءۇشىن جەكە سوت ورىنداۋشىلار پالاتاسىنا جولدانادى»، – دەدى الماتى قالاسى پد ءاپب-نىڭ اكىمشىلىك تاجىريبە ءبولىمىنىڭ اعا ينسپەكتورى سامات ءابجاپاروۆ.
ول سونداي-اق قالا اۋماعىندا بورىشكەرلەردى، ءوز ەركىمەن اكىمشىلىك ايىپپۇلدى ۋاقتىلى تولەمەگەن ادامداردى انىقتاۋ بويىنشا تۇراقتى تۇردە شارالار قابىلدانىپ جاتقانىن اتاپ ءوتتى.