ورتالىق قالالىق كلينيكالىق اۋرۋحاناعا 45 جىل بۇرىن وڭ اياعىنىڭ تىزە بۋىنىنا تىگىن ماشيناسىنىڭ ينەسى كىرىپ كەتكەن ايەل ءتۇستى.
ايەلدىڭ ايتۋىنشا، بالا كۇنىندە جاراقاتتانعان. سول كەزدە ينەنى الىپ تاستاۋ ءۇشىن وپەراسيا جاسالعان، ءبىراق ينە تابىلماعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وسى جىلدار ىشىندە ينە مازامدى العان جوق، بيىل عانا قاتتى اۋىرىپ، كۇننەن-كۇنگە اسقىنا ءتۇستى. اقساڭداپ جۇرە باستادىم. سوندىقتان، ستاسيونارعا جۇگىندىم. ماعان رەنتگەن جاساپ، وپەراسيا جاساۋ قاجەت ەكەنى ايتىلدى»، - دەدى ول.
اۋرۋحانا تراۆماتولوگتارى ينەنى الىپ تاستاۋ بويىنشا جارتى ساعاتقا سوزىلعان وپەراسيا جاسادى. وپەراسيادان سوڭ ايەل اقساڭداپ ءجۇرۋىن قويدى ءارى اۋرۋى باسىلدى.
وپەراسيانى جاساعان تراۆماتولوگ داۋلەت چۋكمانوۆتىڭ ايتۋىنشا، كوپ جىلدار ىشىندە ينە ينكاپسۋلياسيالانعان.
«وپەراسيا ءساتتى ءوتتى، ينە الىنىپ تاستالدى»، - دەدى ول. ءوز كەزەگىندە ايەل دارىگەرلەرگە كاسىبيلىگى ءۇشىن العىسىن ءبىلدىردى.