قازىرگى كەزدە اۋە كولىگى سالاسىندا 6 قازاقستاندىق تاسىمالداۋشى 56 ىشكى باعدار بويىنشا اپتاسىنا 706 رەيستى ورىنداپ كەلەدى. بۇل تۋرالى ق ر يندۋستريا جانە ينفراقۇرىلىمدىق دامۋ ۆيسە-مينيسترى الماز ىدىرىسوۆ ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«ىشكى نارىق جايىندا ايتاتىن بولساق، 2012 جىلدان باستاپ بارلىق شەكتەۋلەر الىنىپ تاستالدى. ياعني ىشكى تۇراقتى تاسىمالداۋعا رۇقساتى بار كەز كەلگەن وتاندىق اۋە كومپانياسى ىشكى باعدارلار بويىنشا رەيستەردى قانداي دا ءبىر شەكتەۋسىز ورىنداي الادى. قازىرگى كەزدە 6 قازاقستاندىق تاسىمالداۋشى (ەير استانا، Fly Arystan، SCAT، Qazaq Air، يۋجنوە نەبو، جەتىسۋ) 56 ىشكى باعدار بويىنشا اپتاسىنا 706 رەيستى ورىنداپ كەلەدى»، - دەدى ا. ىدىرىسوۆ سەناتتا ەلىمىزدەگى اۋە كولىگى ماسەلەلەرىنە قاتىستى جيىن بارىسىندا.
سونىمەن قاتار ول اۋە باعدارلارىن سۋبسيديالاۋ ماسەلەسىنە توقتالدى.
«بۇل قادام 2002 جىلدان بەرى قولدانىلىپ كەلەدى، ماقساتى - ورتالىقتى وڭىرلىك اۋە جەلىلەرىمەن بايلانىستىرۋ. بيىل ورتالىقتان وبلىستارعا (جامبىل، پاۆلودار، سولتۇستىك قازاقستان، اقمولا، اقتوبە، تۇركىستان، ۇلىتاۋ) 21 اۋە باعدارىن سۋبسيديالاۋ ءۇشىن رەسپۋبليكالىق بيۋدجەتتەن 6،3 ملرد تەڭگە سوماسىندا قاراجات ءبولىندى. رەيستەردى «SCAT»، «Qazaq Air» جانە «يۋجنوە نەبو» اۆياكومپانيالارى ورىندايدى. تاريفتەر 10 000 تەڭگەدەن باستالىپ (جەزقازعان – قاراعاندى) 33 000 تەڭگەگە دەيىن قۇرادى (تۇركىستان-ورال)»، - دەدى ۆيسە-مينيستر.
ونىڭ سوزىنە قاراعاندا، رەسپۋبليكالىق بيۋدجەتتى ناقتىلاۋ ناتيجەسىندە بيىل استانا – جەزقازعان، استانا – پاۆلودار، قاراعاندى – جەزقازعان، كوكشەتاۋ – شىمكەنت جانە تاراز – اتىراۋ سياقتى جاڭا باعىتتاردى اشۋ جوسپارلانعان.
«وسى جىلى ناۋرىز ايىندا رەسپۋبليكالىق بيۋدجەتتى ناقتىلاۋ اياسىندا استانا-پاۆلودار، تاراز-اتىراۋ، كوكشەتاۋ -شىمكەنت اۆيامارشرۋتتارىن سۋبسيديالاۋ ءۇشىن 878 ملن تەڭگە سوماسىندا قاراجات ءبولىندى»، - دەدى الماز ىدىرىسوۆ.