الماتىدا كارديولوگيا جانە ىشكى اۋرۋلار عزي-دا ەكىنشى جۇرەك ترانسپلانتاسياسى ءساتتى جاسالدى. 6 ساعاتقا سوزىلعان كۇردەلى وپەراسيا University Medical Center-پەن بىرلەسىپ بەلگىلى كارديوحيرۋرگ يۋريي پيانىڭ جەتەكشىلىگىمەن ءوتتى.
دارىگەرلەر مي ءولىمىن انىقتاعاننان كەيىن، تۋىستارى قايتىس بولعان الماتى وبلىسىنىڭ تۋماسى 45 جاستاعى ەر ادامنىڭ ورگاندارىن الۋعا كەلىسىمىن بەردى.
ولاردىڭ كەلىسىمىنىڭ ارقاسىندا قازاقستاننىڭ 4 ازاماتىنىڭ ءومىرى، ولاردىڭ اراسىندا "ديلاتاسيالىق كارديوميوپاتيا (ۋىتتى)" كۇردەلى جۇرەك اۋرۋىنا شالدىققان 43 جاستاعى ەر ادامنىڭ ءومىرى قۇتقارىلدى. 5 جىل بويى ەنەرگەتيكالىق سۋسىنداردى شامادان تىس تۇتىنۋى دارى-دارمەك تەراپياسىن قابىلدامايتىن جۇرەك قىزمەتى جەتكىلىكسىزدىگىنىڭ سوڭعى ساتىسىنا اكەلگەن.
ناۋقاستى ازداعان فيزيكالىق جۇكتەمەدە اۋا جەتىسپەۋى، 50 مەتر ءجۇرۋ كەزىندە ەنتىگۋ، قالىپتى جاعدايدا، جاتقان كەزدە ەنتىگۋدىڭ جوعارىلاۋى، تەز شارشاۋ جانە جالپى السىزدىك مازالاعان. جاعدايىنىڭ ناشارلاۋى 2023 جىلدىڭ جەلتوقسانىنان باستاپ بايقالا باستادى.
"ەلىمىزدە كارديوحيرۋرگيا مەن كارديورەانيماسيانىڭ دامۋ دەڭگەيى جۇرەكتى ترانسپلانتاسيالاۋ وپەراسيالارىندا وڭ ناتيجەلەرگە قول جەتكىزۋگە مۇمكىندىك بەرەدى. يۋريي ۆلاديميروۆيچ باستاعان UMC كومانداسىنا كومەك پەن قولداۋ كورسەتكەنى ءۇشىن العىسىمىز شەكسىز. ورگانداردى ترانسپلانتاسيالاۋ بويىنشا وپەراسيالار مەديسينا قىزمەتكەرلەرىنىڭ جوعارى بىلىكتىلىگىن تالاپ ەتەدى"، – دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
مارات ورىنباسار ۇلى دونوردىڭ تۋىستارىنا دا العىسىن ءبىلدىردى: «دونورلىققا ءوز ەركىمەن كەلىسىم بەرۋ، ادامداردىڭ ءومىرىن ساقتاپ قالۋعا دايىن بولۋ – ادامگەرشىلىك پەن مەيىرىمدىلىكتىڭ ۇلگىسى. ورگانداردى الۋعا كەلىسىم بەرگەن دونوردىڭ تۋىستارىنىڭ يگى ءىسى زور قۇرمەتكە يە.
"ناۋقاستىڭ جاعدايى وپەراسيانىڭ اۋىرلىعىنا سايكەس قالىپتى. ديناميكا تۇراقتى. ونىڭ جولى بولىپ، وعان دونور تابىلدى. كەيبىرەۋلەر اعزانى جىلدار بويى كۇتۋى مۇمكىن، ءبىراق ولار ۇزاق كۇتە المايدى. مۇنىڭ ءبارى سايكەس دونوردىڭ بولۋىنا بايلانىستى. پاسيەنتتەردىڭ كوپشىلىگى، وكىنىشكە وراي، ترانسپلانتاسياعا جەتپەي قايتىس بولادى. جۇرەك ترانسپلانتاسياسىنسىز ءومىر ءسۇرۋ ۇزاقتىعى از. اۋىر جۇرەك اۋرۋلارى تەز ءورشيدى جانە شۇعىل ەمدەۋدى قاجەت ەتەدى"، – دەپ اتاپ ءوتتى كلينيكانىڭ 1ء-شى باسشىسى.
ينستيتۋتتىڭ كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتايەۆ: "جۇرەكتى ترانسپلانتاسيالاۋ-كۇردەلى وپەراسيالاردىڭ ءبىرى، الايدا ءبىزدىڭ العان تاجىريبەمىز، داعدىلارىمىز، كلينيكامىزدىڭ تەحنيكالىق جاراقتاندىرىلۋى ولاردى جوعارى دەڭگەيدە ورىنداۋعا مۇمكىندىك بەرەدى"، – دەدى.
ايتا كەتۋ كەرەك، دونوردان ەكى بۇيرەك، وكپە، سونىمەن قاتار كوز قابىعى الىندى. بۇيرەك جەتىسۋ وبلىسىنىڭ تۇرعىنى 17 جاستاعى ناۋقاسقا ا.سىزعانوۆ اتىنداعى ۇلتتىق حيرۋرگيا عىلىمي ورتالىعىندا جانە استانالىق 18 جاستاعى پاسيەنتكە University Medical Center-دە ترانسپلانتاسيالاندى، وكپە – "UMC-تە قوستانايلىق 43 جاستاعى پاسيەنتكە، كوز قابىعى كەراتوپلاستيكاسى ەكى رەسيپيەنتكە ترانسپلانتاسيالاندى.
ايتا كەتەيىك، قازاقستاندا 2025 جىلعى 10 قاڭتاردا جۇرەك ترانسپلانتاسياسىن كۇتۋ پاراعىندا 140 ەرەسەك ادام جانە 5 بالا تۇر.