الماتى قالاسىنداعى حيميا-بيولوگيا باعىتىنداعى نازاربايەۆ زياتكەرلىك مەكتەبىندە «زامانداستار جىرلايدى» جانە «دانالىق بەيسەنبى» جوبالارى اياسىندا وقۋشىلاردى قازىرگى اقىن-جازۋشىلاردىڭ شىعارمالارىمەن تانىستىرۋ، ءسوز ونەرىنە باۋلۋ، كوركەم ادەبيەتكە دەگەن قىزىعۋشىلىقتارىن ارتتىرۋ ماقساتىندا ق ر جازۋشىلار وداعىنىڭ مۇشەلەرى، اقىن، «بالدىرعان» جۋرنالىنىڭ باس رەداكتورى ەرعالي باقاش جانە جازۋشى، جۋرناليست ماقسات مالىكپەن كەزدەسۋ ءوتتءى، دەپ حابارلايدى aqshamnews.kz.
كەزدەسۋ شىمىلدىعىن زياتكەرلىك مەكتەبىنىڭ «نۇر-سازى» حالىق اسپاپتار وركەسترىنىڭ دوبىراشىلارى «ەركە سىلقىم» كۇيىمەن اشتى.
وقۋشىلار كەزدەسۋ قوناقتارىنىڭ شىعارماشىلىعىنا ارنالعان تانىستىرۋ بەينەبايان جاساپ، ولەڭدەرىن وقىپ، اڭگىمەلەرى بويىنشا پىكىر الماستى. الدىن الا قالامگەرلەردىڭ شىعارمالارىن وقىعان وقۋشىلار ءوز ويلارىن اشىق ايتىپ، شىعارما توڭىرەگىندە وزىندىك كوزقاراستارىن جەتكىزدى.
-بۇگىن ءبىز وقۋشىلارمەن كەزدەستىك، اڭگىمە قۇردىق، وتە كەرەمەت! وقۋشىلاردىڭ وي-ورىستەرى كەڭ ەكەنىن اڭعاردىق، ويلاۋ ەرەكشەلىگى دە مۇلدەم باسقا، ەركىن جەتكىزەدى. حيميا-بيولوگيا باعىتىنداعى مەكتەپتە وقىپ ءبىر سالالى بولىپ قالماي، عىلىم مەن ادەبيەتتى قوسا الىپ جۇرگەندەرى، قازاق ادەبيەتىنەن حابارلارى بار ەكەندىگى قۋانارلىق جاعداي،- دەدى ماقسات مالىك.
كەزدەسۋ قوناقتارى وقۋشىلارعا ماعىنالى دا ءماندى اڭگىمە ايتا وتىرىپ، وقۋشىلارعا شىعارماشىلىقپەن اينالىسۋعا، كورگەن-تۇيگەنىن جازۋعا ىنتالاندىردى. كەزدەسۋ سوڭىندا قالامگەرلەر مەكتەپ كىتاپحاناسىنا، وقۋشىلارعا «بالدىرعان»، «ۇلان»، «اق جەلكەن» باسىلىمدارىن جانە ءوز تۋىندىلار جيناعىن تارتۋ ەتتى.
- بۇگىنگى كەزدەسۋگە قاتىسقان وقۋشىلاردىڭ، جاس تالاپكەرلەردىڭ وزدەرىن ۇستاۋى، سويلەۋ مادەنيەتى، ءبىلىم دەڭگەيلەرى جوعارى ەكەن دەگەن باعا بەرۋىمىزگە بولادى. قازىرگى زاماندا بالالاردىڭ ويىن جەتكىزۋ دەگەن ۇلكەن پروبلەما،- دەپ ەرعالي باقاش زياتكەرلەردى «بالدىرعان» جۋرنالىنا شىعارمالار جازىپ، تىعىز قارىم-قاتىناس ورناتۋعا شاقىردى.
تاعىلىمدى كەزدەسۋ سوڭىندا وقۋشىلار ارنايى ۋاقىت ءبولىپ كەلگەن اقىن-جازۋشىعا العىسىن ءبىلدىردى.
- زياتكەرلىك مەكتەپتە قازاقتىڭ كورنەكتى وكىلدەرى – قازىرگى زاماننىڭ اقىن-جازۋشىلارىمەن كەزدەسۋ ۇيىمداستىرۋ دۇرىس جولعا قويىلعان. ءار كەزدەسۋ وقۋشىلارعا وي ءتۇيدىرىپ، قازاق ادەبيەتىنە قىزىعۋشىلىقتى ارتتىرادى. بۇگىنگى كەزدەسۋ رۋحاني الەمگە ساياحات بولىپ، زياتكەرلەردىڭ جان-دۇنيەسىن بايىتۋعا ۇلكەن سەپتىگىن تيگىزدى دەپ ويلايمىن،- دەدى ۇيىمداستىرۋشى، پەداگوگ-كۋراتور جانارگۇل يسلام قىزى.