قازاق ءتىلى – حالقىمىزدىڭ باعا جەتپەس رۋحاني مۇراسى، ۇلتتىڭ تىرەگى. انا ءتىلىمىزدىڭ مارتەبەسىن كوتەرۋ، ونى قۇرمەتتەپ، كەڭىنەن قولدانۋ – ءاربىر قازاقستاندىقتىڭ باستى مىندەتتەرىنىڭ ءبىرى.
بۇگىندە وسى باعىتتا ەلىمىزدىڭ جالپى ءبىلىم بەرەتىن مەكتەپتەرىندە قازاق ءتىلىنىڭ ماڭىزدىلىعىن ناسيحاتتاۋعا ارنالعان ءبىرقاتار شارالار ۇيىمداستىرىلۋدا.
№37 جالپى ءبىلىم بەرەتىن مەكتەپ تە بۇل يگى ىستەردەن شەت قالعان جوق. مەكتەپ ديرەكتورى گۇلميرا جاقىبايەۆانىڭ ايتۋىنشا، ءبىلىم مەكەمەسىندە قازاق ءتىلىن تەرەڭىرەك مەڭگەرۋ، ونىڭ قوعامداعى ورنىن نىعايتۋ ماقساتىندا بىرنەشە ماڭىزدى جوبالار مەن ءىس-شارالاردى جۇزەگە اسىرىلىپ كەلەدى.
«تىلگە دەگەن سۇيىسپەنشىلىكتى ارتتىرۋ – باستى ماقساتىمىز. مەكتەبىمىزدە جىل سايىن «ءتىل – مادەنيەتتىڭ ايناسى» اپتالىعى وتكىزىلىپ، ونىڭ اياسىندا ءتۇرلى اشىق ساباقتار، دوڭگەلەك ۇستەلدەر جانە شىعارماشىلىق بايقاۋلار ۇيىمداستىرىلادى. بۇل ءىس-شارالار وقۋشىلاردىڭ انا تىلىنە دەگەن قىزىعۋشىلىعىن ارتتىرىپ، ولاردىڭ سوزدىك قورىن بايىتادى» - دەيدى مەكتەپ باسشىسى.
مەكتەپتە وقۋشىلار اراسىندا ەسسە بايقاۋى، «ءسوز مەرگەن» سايىسى، «ماقال-ماتەلدەردى بىلەسىڭ بە؟» اتتى ۆيكتورينالار وتكىزىلىپ، تىلگە دەگەن سۇيىسپەنشىلىكتى دامىتۋعا ەرەكشە كوڭىل بولىنەدى. سونىمەن قاتار، اتا-انالاردىڭ قاتىسۋىمەن كەزدەسۋلەر وتكىزىلىپ، بالالاردىڭ تىلدىك مادەنيەتىن قالىپتاستىرۋداعى وتباسىنىڭ ءرولى تالقىلانادى.
«ءتىل ساقشىلارى» جوباسى – وقۋشىلاردىڭ بەلسەندى قادامى
ءبىلىم وشاعىنداعى قولعا الىنعان ەرەكشە جوبالاردىڭ ءبىرى – «ءتىل ساقشىلارى». بۇل جوبا وقۋشىلاردى ءتىل تازالىعىن ساقتاۋعا، دۇرىس سويلەۋگە، قاتەسىز جازۋعا باۋلۋدى ماقسات ەتەدى. جوبا اياسىندا بالالار ءتىلدىڭ قورعاۋشىلارى ءرولىن اتقارا وتىرىپ، ونى قۇرمەتتەۋگە جانە قورعاۋعا ۇيرەنەدى. بۇل ولاردىڭ تىلدىك ساۋاتتىلىعىن ارتتىرىپ، ۇلتتىق قۇندىلىقتارعا دەگەن سۇيىسپەنشىلىگىن قالىپتاستىرادى.
بىرلىكتىڭ سيمۆولى
قازاق ءتىلىن دارىپتەۋگە باعىتتالعان جۇمىس بارىسىندا مەكتەپ كىتاپحاناسىندا «قازاق ادەبيەتىنىڭ ءىنجۋ-مارجاندارى» اتتى كورمە ۇيىمداستىرىلىپ، وقۋشىلار قازاق جازۋشىلارى مەن اقىندارىنىڭ شىعارمالارىمەن تانىسادى. سونىمەن بىرگە، ۇلتتىق ويىندار، ادەبي-مۋزىكالىق كەشتەر مەن مەرەكەلىك قويىلىمدار ارقىلى وقۋشىلار ۇلتتىق رۋحتى بويلارىنا سىڭىرەدى.
مەكتەپ – ۇلتتىق قۇندىلىقتاردىڭ بەسىگى
– قازاق ءتىلى – ءبىزدىڭ بولاشاعىمىزدىڭ نەگىزى. مەكتەپ – تەك ءبىلىم ورداسى عانا ەمەس، ۇلتتىق قۇندىلىقتاردى ساقتاپ، ۇرپاق بويىنا دارىتاتىن رۋحاني ورتالىق. سوندىقتان انا ءتىلىمىزدى قادىرلەۋ، ونىڭ مارتەبەسىن ارتتىرۋ – ءبىزدىڭ باستى پارىزىمىز.
ءبىز، مەكتەپ ۇستازدارى، اتا-انالار مەن وقۋشىلار، وسى باعىتتا بىرلەسە جۇمىس ىستەي وتىرىپ، قازاق ءتىلىنىڭ قوعامداعى ورنىن نىعايتۋعا جانە جاس ۇرپاقتىڭ تىلگە دەگەن قۇرمەتىن ارتتىرۋعا بار كۇش-جىگەرىمىزدى سالامىز. قازاق تىلىنە دەگەن سۇيىسپەنشىلىك – ەلىمىزدىڭ جارقىن بولاشاعىنىڭ كەپىلى، - دەيدى №37 جالپى ءبىلىم بەرەتىن مەكتەپتىڭ ديرەكتورى گۇلميرا مۇقاتاي قىزى.