4 ناۋرىز كۇنى ساعات 11:22-دە بولعان 5 بالدىق جەر سىلكىنىسىنەن كەيىن الماتىدا 384 قابىلداۋ پۋنكتى اشىلدى. ونىڭ ىشىندە 229 مەكتەپ جانە 115 بالاباقشا، 15 جوو، 20 كوللەدج جانە 5 ستاديون بار.
جەر دۇمپۋىنەن كەيىن قابىلداۋ پۋنكتەرىنە مىڭعا جۋىق قالا تۇرعىندارى مەن قوناقتارى جۇگىنگەن. مىسالى، №59 قابىلداۋ پۋنكتى نەمەسە بولتىرىك اتىحان ۇلى اتىنداعى №36 گيمنازياعا 80-گە جۋىق ادام كەلگەن. مەكتەپ قىزمەتكەرلەرى كەلگەن بارلىق ادامداردى تىركەپ، بىردەن ءقاۋىپسىز ورىندارعا اپارعان. پانا ىزدەگەن قالا تۇرعىندارى مەكتەپتىڭ ءبىرىنشى قاباتىنداعى كابينەتتەر مەن سپورتزالعا ورنالاستىرىلعان. سپورت كەشەنىندە ادامدارعا ارناپ ماتراس تا جايىلعان. سونداي-اق، ءبىلىم ورداسىندا ادامدار ءۇشىن اسحانا دا جۇمىس ىستەپ تۇر. بۇل قابىلداۋ پۋنكتىنە كەلگەن ادامداردىڭ دەنى ستۋدەنتتەر. جاقىن ماڭدا جاتاقحانادا نە حوستەلدەر تۇراتىن ستۋدەنتتەر وسى جەردەن ءقاۋىپسىز پانا تاپقاندارىن ايتادى. دەگەنمەن، بارلىق قابىلداۋ پۋنكتەرىنە ادام كوپ دەۋگە بولمايدى. مىسالى، №16 ياسلي-ساد بالاباقشاسى نەمەسە №84 قابىلداۋ پۋنكتىنە نەبارى 2 ادام كەلگەن.
تاعى ءبىر قابىلداۋ پۋنكتى «دينامو» ستاديونىندا ورنالاسقان. مۇندا مەكەمە قىزمەتكەرلەرىنىڭ مالىمەتىنشە، 70-تەن استام تۇرعىن جۇگىنگەن. ونىڭ ىشىندە 20-عا جۋىق بالا بار.
- «دينامو» ستاديونىندا №82 قابىلداۋ پۋنكتى ورنالاسقان. جەر سىلكىنىسىنەن كەيىن كەلگەن بارلىق ادامداردى قارسى الدىق. تاڭەرتەڭنەن بەرى 70 ادامداي بولدى. ونىڭ ءبىرازى ۇيلەرىنە ءقايتىپ ۇلگەردى. ءقازىر 20 شاقتى تۇرعىن ءالى دە وتىر. ەشكىمدى قۋمايمىز، ادامدار قالاعانشا وتىرا الادى. كەيبىر ادامدار قورقىپ جاتىر. ءبىراق ءبىز ولارمەن ءتۇسىندىرۋ جۇمىستارىن جۇرگىزىپ، قاۋىپسىزدىك تەحنيكاسىن تۇسىندىردىك، – دەدى «دينامو» ستاديونىنىڭ قىزمەتكەرى قازىبەك جۇمانوۆ.
