حالىقارالىق بالالاردى قورعاۋ كۇنىنە وراي الماتى قالاسىنداعى №59 مەكتەپ-گيمنازيادا «بالالىق شاق ماڭگى بولسىن!» اتتى ەرەكشە مەرەكەلىك شارا ۇيىمداستىرىلدى. وعان 300-گە جۋىق وقۋشى قاتىستى.
مادەني ءىس-شارادا ءاپپاق فۋتبولكا مەن شاپكا كيگەن بالالار «ءارقاشان كۇن سونبەسىن!» ءانىن ايتىپ، ۇجىمدىق فلەشموب بيلەدى. ءبىرى سۋرەت سالىپ، ءبىرى ءان شىرقاپ، بارلىعى بىردەي ورتاق بي بيلەگەن وقۋشىلار مەرەكەنىڭ ءسانىن كەلتىردى.
مەكتەپ اۋلاسى دا مەرەكەگە ساي بەزەندىرىلگەن. «ۇلى دالا ۇرپاعى» اتتى ەتنولاگەردىڭ باننەرى ىلىنگەن اۋلادا كيىز ءۇي دە بار.
فلەشموبتىڭ ماقساتى - بالالىق شاقتىڭ جارقىن ساتتەرىن بەينەلەۋ، بي مەن ۇجىمدىق ارەكەت ارقىلى شاتتىق پەن مەيىرىمدىلىك اتموسفەراسىن قالىپتاستىرۋ.
مەكتەپ-گيمنازيا ديرەكتورى اسان تورعانبەكوۆتىڭ ايتۋىنشا، بۇل شارا الماتى قالاسى ءبىلىم باسقارماسىنىڭ ارنايى جوسپارى نەگىزىندە 22 مامىر مەن 1 ماۋسىم ارالىعىندا وتكىزىلۋدە.
"وقۋشىلارىمىز جازعى دەمالىسقا كوتەرىڭكى كوڭىل-كۇيمەن شىقسىن دەگەن نيەتپەن وسىنداي شارا ۇيىمداستىردىق. مەكتەپ جانىنان ەتنولاگەر اشتىق. وعان كەلەتىن بالالار كۇن سايىن قاراجورعا بيىمەن جاتتىعۋ جاساپ، ۇلتتىق ويىندارعا قاتىسادى. مۇنداي شارالار وقۋشىلارىمىزدىڭ بوس ۋاقىتىن مازمۇندى وتكىزۋگە سەپ بولادى. ال جالپى، بالالار مەرەكەسى – ءار بالانىڭ جۇرەگىندە شاتتىق پەن ءۇمىت وياتاتىن ەرەكشە كۇن. ءبىز جىل سايىن بۇل مەيرامدى كوتەرىڭكى كوڭىل-كۇيمەن قارسى الىپ، شاكىرتتەرىمىزدىڭ شىعارماشىلىعىن دامىتۋعا مۇمكىندىك بەرەمىز"، – دەيدى اسان ەرجان ۇلى.
ايتا كەتەيىك، بيىل مەكتەپتى 1355 وقۋشى اياقتاپ وتىر. ونىڭ ىشىندە 11-سىنىپتى – 77 تۇلەك، 9-سىنىپتى – 156 وقۋشى ءتامامدادى. 11-سىنىپتان 7 وقۋشى – «التىن بەلگىگە»، 4 وقۋشى – «ۇزدىك اتتەستاتقا» ۇمىتكەر. ال 9-سىنىپتاردان 25 وقۋشى «ۇزدىك اتتەستاتقا» ۇسىنىلعان.