الماتى قالاسى جاستار ساياساتى باسقارماسىنىڭ قولداۋىمەن جەتىسۋ اۋدانىندا بوس جۇمىس ورىندارىنىڭ جارمەڭكەسى ءوتتى.
بۇل — مەگاپوليستەگى ۇزدىك كومپانيالاردىڭ وزىندەگى بوس جۇمىس ورىندارىن ۇسىنىپ، ىنتالى جاستارمەن تىكەلەي جۇزدەسىپ، ديالوگ ورناتا الاتىن ماڭىزدى الاڭ. ءىس-شاراعا IT، قارجى، ءبىلىم بەرۋ جانە باسقا دا سالالارداعى جەتەكشى كومپانيالاردىڭ وكىلدەرى قاتىستى. ولاردىڭ قاتارىندا ءىرى كورپوراسيالارمەن بىرگە بولاشاعى زور ستارتاپتار دا بار.
“اينابۇلاق-1” ىقشاماۋدانىنداعى ادام اياعى كوپ جۇرەتىن اربات الاڭىندا وتكەن جارمەڭكەدە جاستار ءوز تۇيىندەمەسىن تاپسىرىپ، HR ماماندارىمەن تىكەلەي اڭگىمەلەسۋ مۇمكىندىگىنە يە بولدى. سونىمەن قاتار، جۇمىسقا ورنالاسۋعا قاتىستى پايدالى كەڭەستەر مەن باعىت-باعدار بەرۋ ءۇشىن ارنايى ۇيىمداستىرىلعان كونسۋلتاسيالىق بۇرىشتاردىڭ الدى دا بوس بولمادى.
”بۇل — جىل باسىنان بەرى قالالىق مانساپ ورتالىعى ۇيىمداستىرىپ وتىرعان جەتىنشى جارمەڭكە. بۇگىنگى ءىس-شاراعا قىرىقتان استام مەكەمە قاتىستى. ەڭ باستى ماقسات — وسى جوبا ارقىلى جۇمىس ىزدەپ جۇرگەن جاستارعا قولداۋ، جول كورسەتۋ، جۇمىس تابۋىنا كومەكتەسۋ. سونداي-اق، وسى كومپانيالار وكىلدەرىنىڭ كومەگىمەن شەبەرلىك ساباقتارىن، سەمينار، دارىستەر وتكىزۋدەمىز. ناتيجەسى جاقسى. نەگىزى، بوس جۇمىس ورىندارى جارمەڭكەسىنە تەك جاستار قاتىسادى دەگەن شەكتەۋ جوق، جۇمىس ىزدەپ جۇرگەن ەرەسەكتەر دە كەلىپ قاتىسا الادى”، — دەيدى الماتى قالالىق مانساپ ورتالىعىنىڭ قىزمەتكەرى اقارىس تورەبەكوۆ.