ونى الماتىنىڭ ءبىلىم باسقارماسى انتيكورعا ۇستاپ بەرگەن.
الماتى قالاسىنىڭ ءبىلىم باسقارماسى مەكتەپتەرىنىڭ بىرىندە اقشا ۇرلانعانىن انىقتاپ، ءتيىستى ماتەريالداردى سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنە تاپسىردى، دەپ حابارلادى aqshamnews.kz
«مونيتورينگ ناتيجەلەرى بويىنشا الماتى قالاسىنىڭ ءبىلىم باسقارماسى اعىمداعى جىلدىڭ ناۋرىز ايىندا «№5 مەكتەپ گيمنازياسى» كمم-نىڭ 11 قىزمەتكەرىنىڭ بانكتىك كارتوچكالىق شوتتارىنا 2023 جىلدىڭ ءساۋىرى مەن اقپان ايى ارالىعىندا جالپى سوماسى 34 271 330 تەڭگەگە ارتىق بەلگىلەنگەن جالاقى نورماسىن ەسەپتەۋ جانە اۋدارۋ زاڭناماسىنىڭ نورمالارىن بۇزۋ فاكتىسىن انىقتادى. ماتەريالدار قازاقستان رەسپۋبليكاسى سىبايلاس جەمقورلىققا قارسى ءىس - قيمىل اگەنتتىگىنىڭ الماتى قالاسى بويىنشا دەپارتامەنتىنە بەرىلدى»، - دەپ حابارلادى الماتى قالاسىنىڭ ءبىلىم باسقارماسى.
بەرىلگەن ماتەريالدار نەگىزىندە ق ر قك 189-بابى بويىنشا مەكتەپتىڭ باس بۋحگالتەرى ا.ي. قاتىستى سوتقا دەيىنگى تەرگەۋ باستالدى. سوتتا مەكتەپتىڭ باس بۋحگالتەرى «№5 مەكتەپ-گيمنازيا» كمم-دە ناقتى جۇمىس ىستەمەيتىن تۇلعالاردىڭ كارتوچكالىق بانكتىك شوتتارىنا ەڭبەك كەلىسىمدەرىمەن بەلگىلەنگەن ۇستەمەاقىلاردى جانە جالاقى رەتىندە بيۋدجەت قاراجاتىن زاڭسىز ەسەپتەۋ جانە اۋدارۋ جولىمەن بيۋدجەت قاراجاتىن ۇرلاۋ فاكتىسىن تولىق راستاعان.
سوتقا دەيىنگى جانە سوت تەرگەۋى بارىسىندا سوتتالۋشى مۇلىكتىك زالالدى تولىق كولەمدە – 38 060 353 تەڭگەگە ءوز ەركىمەن وتەگەن. الماتى قالاسىنىڭ قىلمىستىق ىستەر جونىندەگى اۋەزوۆ اۋداندىق سوتىنىڭ 2024 جىلعى 22 شىلدەدەگى ۇكىمىمەن ول 7 جىلعا شارتتى تۇردە سوتتالدى.
ۇكىم زاڭدى كۇشىنە ەنگەن جوق. مەكتەپ ديرەكتورىنا قاتىستى تارتىپتىك جازا شارالارىن قولدانۋ تۋرالى ماسەلە ەڭبەك دەمالىسىنان شىققاننان كەيىن شەشىلەتىن بولادى.