الماتىدا 2024 جىلدىڭ 9 تامىزىندا جالپى قالالىق بوس ورىندار جارمەڭكەسى وتەدى. مانساپ ورتالىعىنىڭ باسشىسى ادىلەت جاڭابايەۆ وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگتە نيەت بىلدىرۋشىلەردى ءىس-شاراعا قاتىسۋعا شاقىردى، دەپ حابارلايدى aqshamnews.kz
ادىلەت جاڭابايەۆ بوس ورىندار جارمەڭكەسىنە ءبىلىم، مەديسينا، قارجى، ءوندىرىس، لوگيستيكا جانە باسقا دا سالالارداعى بوس جۇمىس ورىندارى بار ەلۋدەن استام جۇمىس بەرۋشى قاتىساتىنىن حابارلادى.
ۇيىمداستىرۋشىلار جارمەڭكەگە مىڭنان استام ادام قاتىسادى دەپ بولجاپ وتىر.
«جارمەڭكەلەردى وتكىزۋدىڭ ماقساتى - جاستارعا، وقۋ ورىندارىنىڭ تۇلەكتەرىنە، جۇمىس ىزدەۋشىلەرگە، ازاماتتاردىڭ جەكەلەگەن ساناتتارىنا جۇمىس ورىندارىنىڭ قولجەتىمدىلىگىن كەڭەيتۋ، سونداي - اق جۇمىس بەرۋشىلەرگە لايىقتى ۇمىتكەرلەردى تارتۋ ارقىلى جۇمىسقا الۋ پروسەسىن جەڭىلدەتۋ جانە ولاردىڭ جۇمىسقا ورنالاسۋىنا جاردەمدەسۋ بولىپ وتىر»، - دەپ تولىقتىردى ول. جوو تۇلەكتەرى مەن جۇمىسسىز جۇرگەن جاستارعا، بىلىكتىلىگى مەن تاجىريبەسى جوق جاستارعا ەرەكشە كوڭىل بولىنەدى. وكق سپيكەرى جۇمىسسىز جۇرگەن 4000 جاس SMS اقپارات العانىن اتاپ ءوتتى.
«جارمەڭكەگە مەملەكەتتىك باعدارلامالار بويىنشا جۇمىسقا ورنالاسقىسى كەلەتىن ازاماتتارعا قىزمەت كورسەتەتىن ءبىزدىڭ قىزمەتكەرلەر دە قاتىسادى. مىسالى، جاستار ءۇشىن بۇل «جاستار پراكتيكاسى»، «العاشقى جۇمىس ورنى» باعدارلامالارى نەمەسە تەگىن وقۋ كۋرستارى بولۋى مۇمكىن»، - دەدى ادىلەت جاڭابايەۆ.
سپيكەر سونداي-اق، جۇمىسقا تۇرار الدىندا قالاي اڭگىمەلەسۋ كەرەكتىگى جونىندەگى كەڭەستەرىن بەردى جانە جاقسى تۇيىندەمە دايىنداۋدىڭ ماڭىزدى ەكەنىن ايتتى.
«سۇراقتارعا دايىن بولۋ، ماماندىقتىڭ وزەكتىلىگى مەن قاجەتتىلىگى، سونداي-اق الدىڭعى جۇمىس ورنىنان ۇسىنىم حاتتىڭ بولۋى جۇمىسقا ورنالاسۋعا كومەكتەسەدى. وسىعان بايلانىستى جارمەڭكە باعدارلاماسىندا الماتى قالاسىنىڭ ەڭبەك موبيلدىلىگى، ورتالىعىنىڭ كاسىبي باعدار بەرۋشىلەرىنەن ترەنينگتەر مەن شەبەرلىك سىنىپتارى قاراستىرىلعان»، - دەدى ول.
جارمەڭكەلەردى وتكىزۋ كومپانيا وكىلدەرىنە ءوز كاسىپورىندارىنىڭ مۇمكىندىكتەرىن تانىستىرۋعا مۇمكىندىك بەرەدى، ال جۇمىس ىزدەۋشىلەر قىسقا مەرزىمدە كادرلاردى ىرىكتەۋگە مۇددەلى جۇمىس بەرۋشىلەرمەن سويلەسە الادى، وزدەرىن قىزىقتىراتىن بوس جۇمىس ورىندارىن تاڭداپ، تاڭدالعان بوس جۇمىس ورىندارىنا الدىن الا اڭگىمەلەسۋدەن وتە الادى.
«جۇمىس تاپقىسى كەلەتىندەردىڭ ءبارىن تۇراقتى جۇمىسقا ورنالاسۋعا تاماشا مۇمكىندىك بەرەتىن جارمەڭكەگە شاقىرامىز»، - دەدى ءا.جاڭابايەۆ.
جارمەڭكەنىڭ وتەتىن ورنى: جىبەك جولى داڭعىلى، پانفيلوۆ كوشەسىنىڭ قيىلىسى (اربات) ساعات 10:00-دە.
تولىعىراق اقپاراتتى دوستىق داڭعىلى، 85 مەكەنجايىندا ورنالاسقان الماتى قالاسىنىڭ مانساپ ورتالىعىنان الۋعا بولادى. بولماسا، +7 727 310-47-82 تەلەفون ءنومىرى ارقىلى.