ناۋرىزباي اۋدانىنداعى «نۇرلى دالا» تۇرعىن ءۇي كەشەنىنە تىرشىلىك كوزى ارنايى كولىكتەرمەن جەتكىزىلۋدە.
دەسە دە، بارلىعىنا بىردەي جەتپەيدى. تۇرعىندار شىلدەنىڭ شىلىڭگىر ىستىعىندا جۋىنىپ-شايىنۋدان قالعانىن ايتىپ شاعىمدانۋدا، دەپ حابارلايدى Almaty-akshamy.kz
ونىڭ وزىنە قول جەتكىزۋ ءۇشىن ساعاتتاپ كەزەككە تۇرۋ قاجەت. جاعدايدى پايدالانىپ، ماڭايداعى دۇكەندەر دە اۋىز سۋ باعاسىن قىمباتتاتىپ جىبەرگەن. شاراسىز تۇرعىندار ءتىپتى ارىقتان اكەلىنگەن سۋدى دا پايدالانعان.
«قالپىنا كەلتىرۋ جۇمىستارى تۇننەن تاڭەرتەڭگە دەيىن جوسپارلانعان بولاتىن. الايدا سۋىق سۋدى ءوشىرۋ قيىنداۋىنا بايلانىستى جۇمىستار ۇزاق ۋاقىتقا سوزىلدى. بۇگىن قۇبىردى تولىقتاي جوندەپ، اۋىز سۋدى بەردىك»، - دەيدى ناۋرىزباي اۋداندىق تۇرعىن ۇي-كوممۋنالدىق شارۋاشىلىق ءبولىمىنىڭ باس مامانى فارحاد جاڭبىروۆ.
تۇرعىندار ىستىق سۋدان دا قاعىلعان. اكىمدىكتەگىلەردىڭ ايتۋىنشا، ءقازىر جىلىتۋ ماۋسىمىنا دايىندىق جۇمىستارى ءجۇرىپ جاتىر. سوندىقتان ول تامىز ايىندا قوسىلادى دەيدى. ال، ءجيى سونەتىن جارىق ماسەلەسىنە وسىعان دەيىن ورىن العان اپاتتار سەبەپ. الداعى ۋاقىتتا مۇنداي جاعداي قايتالانبايدى دەپ سەندىردى.