ولار ازاماتتاردان حالىقتى الداپ جۇرگەن كرەديت مەنەدجەرلەرىن اشكەرەلەۋگە كومەكتەسۋدى سۇرايتىن بولعان.
الاياقتار قازاقستاندىقتاردى الداۋدىڭ جاڭا ءادىسىن ويلاپ تاپتى، دەپ حابارلايدى Almaty-akshamy.kz
بۇرىن «بانكتەن» قوڭىراۋ شالۋ كەڭ قولدانىلسا، ەندى الاياقتار جاڭا تاسىلگە كوشكەن.
كتك ارناسىنىڭ حابارلاۋىنشا، 48 جاستاعى يۋريي فومينىح كۇتپەگەن جەردەن قارىزعا باتقان. ول 4 ميلليون تەڭگەگە ەكى كرەديتتى قالاي راسىمدەگەنىن تۇسىنبەي وتىر. ەندى ول اي سايىن بانكتەرگە 120 000 تەڭگە تولەۋگە ءماجبۇر. ونىڭ مۇنداي تولەمگە شاماسى كەلمەيدى.
ايتۋىنشا، ول ادامداردى اياۋسىز الدايتىن ينتەرنەت-الاياقتاردى اشكەرەلەيمىن دەپ قارىزعا باتقان. بەيتانىس بىرەۋلەر تەلەفون سوعىپ، وزدەرىن ۇلتتىق بانكتىڭ قىزمەتكەرلەرىمىز دەپ تانىستىرعان، سىپايى سويلەسىپ، كومەك سۇراعان. يۋريي بۇل ارەكەتتىڭ استارىندا الاياقتاردىڭ ارام پيعىلى جاتقانىنان سەزىكتەنبەي، قولۇشىن سوزۋعا بىردەن كەلىسكەن.
«ولار بانك قىزمەتكەرلەرىن تەكسەرۋ كەرەك دەپ ءتۇسىندىردى. ولار وزدەرىن تانىستىرىپ، ءاتى-جونىن، جەكە كۋالىك نومىرلەرىن، بايلانىس تەلەفوندارىن ايتتى. ەگەر كۇماندانسام، راس-وتىرىگىن انىقتاۋىما بولاتىنىن جەتكىزدى. مەن قايتا حابارلاسقانىمدا، راسىندا دا مۇنداي ادامدار جۇمىس ىستەيتىنىن ايتتى. سوندىقتان سەنىپ قالدىم»، - دەدى فومينىح.
الاياقتار ۇيالى تەلەفونعا قوڭىراۋ شالىپ، وزدەرىن بانكتەگى قاۋىپسىزدىك قىزمەتىنىڭ ماماندارى نەمەسە پوليسيا قىزمەتكەرى دەپ تانىستىرادى. كەيىن ادامداردى الداپ جۇرگەن كرەديت مەنەدجەرلەرىن اشكەرەلەۋ ءۇشىن ارنايى وپەراسياعا اتسالىسۋدى سۇرايدى.
الاياقتاردىڭ ايتۋىنشا، مۇنداي مەنەدجەرلەردى انىقتاۋ ءۇشىن كرەديت الىپ، اقشانى ارنايى ەسەپشوتقا اۋدارۋ كەرەك.
ال پوليسەيلەر حالىقتان بەيتانىس ادامداردىڭ قوڭىراۋىنا سەنبەۋدى، ولارعا كرەديت الىپ بەرمەۋدى سۇرايدى.
«ىشكى ىستەر ورگاندارى جۇرگىزىپ جاتقان پروفيلاكتيكالىق جۇمىستارعا قاراماستان، ازاماتتاردىڭ اڭعالدىعى تاڭعالدىرادى. ءبىزدىڭ وبلىستا جۇمىس ىستەپ تۇرعان بانكتەردىڭ قىزمەتكەرلەرى بانكتەن ەشكىم تەلەفون سوقپايتىنىن جاقسى بىلسە دە، وزدەرى الاياقتاردىڭ قۇربانى بولعان. كۇدىكتىلەردىڭ كوپ جاعدايدا قازاقستاننان تىس جەردە بولۋى قىلمىستى اشۋدى قيىنداتىپ وتىر. سوندىقتان جابىرلەنۋشىلەر كرەديتتى تولەۋگە ءماجبۇر بولادى»، - دەدى سقو پد اعا جەدەل ۋاكىلى اندرەي اكوپيان.