الماتىدا جاڭا وقۋ جىلى قارساڭىندا 980 ورىندىق 3 زاماناۋي جاتاقحانا اشىلدى.
2024 جىلى 24 تامىزدا جاڭا وقۋ جىلىنىڭ قارساڭىندا جەكە ينۆەستيسيا ەسەبىنەن 980 ورىندىق 3 جاتاقحانا سالتاناتتى تۇردە اشىلدى. اشىلۋ سالتاناتىنا ق ر عىلىم جانە جوعارى ءبىلىم ءمينيسترى ساياسات نۇربەك، الماتى قالاسى اكىمىنىڭ ورىنباسارى ازامات قالدىبەكوۆ، قوعام بەلسەندىلەرى مەن قالا جاستارى قاتىستى، دەپ حابارلايدى ashamnews.kz.
جاتاقحانالار بارلىق تالاپقا تولىقتاي ساي. مۇندا تۇرمىسقا قاجەتتىنىڭ ءبارى بار. كورپۋستا ستۋدەنتتەرگە ارنالعان كوۆوركينگ ايماعى، اسحانا جانە كونفەرەنس زالى قاراستىرىلعان.
بۇعان دەيىن الماتى قالاسىنىڭ اكىمى ەربولات دوسايەۆ جاتاقحانا ماسەلەسى تىكەلەي باقىلاۋىندا ەكەنىن ايتىپ، الماتىعا وقۋعا كەلگەن ستۋدەنتتەردىڭ جوعارى ءبىلىم الۋمەن قاتار، جايلى جاتاقحانادا تۇرۋلارىن قامتاماسىز ەتۋ كەرەكتىگىن ايتقان بولاتىن.
اشىلۋ سالتاناتىنا قاتىسقان قالا اكىمىنىڭ ورىنباسارى ازامات قالدىبەكوۆ الماتى قالاسىنىڭ اكىمى ەربولات دوسايەۆتىڭ قۇتتىقتاۋ ءسوزىن وقىدى:
«ستۋدەنتتەر ءۇيى – بۇل الماتى كارتاسىنداعى جاي عانا جاڭا نىسان ەمەس. وسىنداي جاعدايدا تۇراتىن ءاربىر ستۋدەنت ءوزىن ۇيىندەگىدەي سەزىنىپ، جاڭا ورتاعا وڭاي بەيىمدەلىپ، ساپالى ءبىلىم الىپ، قالانىڭ دامۋىنا ۇلەس قوسا الادى. ايتا كەتەرلىگى، بۇل جاتاقحانالار جەكە قاراجات ەسەبىنەن سالىندى، بۇل ءوز الەۋەتى وزىنە جەتەتىن مەگاپوليس ءۇشىن جاقسى تاجىريبە»، – دەدى مەگاپوليس باسشىسى قۇتتىقتاۋ سوزىندە.
سونداي-اق، ازامات قالدىبەكوۆ الماتى اكىمدىگى قازاقستاندىق جانە شەتەلدىك ستۋدەنتتەردىڭ جايلى جاعدايدا ءومىر ءسۇرۋى ءۇشىن ستۋدەنتتىك جاتاقحانالار قۇرىلىسىن جالعاستىرۋدى كوزدەپ وتىرعانىن ايتتى. 2024 جىلى 5025 ورىندىق 10 نىساندى، ال 2025-2026 جىلدارى 34 مىڭنان استام ورىندىق جاتاقحانالاردى پايدالانۋعا بەرۋ جوسپارلانعان.
ەستەرىڭىزگە سالا كەتەيىك، جاتاقحانا قۇرىلىسىن ءتيىمدى ۇيلەستىرۋ ءۇشىن ستۋدەنتتىك جاتاقحانالار سالۋ جونىندەگى جوبالىق كەڭسە جۇمىس ىستەپ تۇر. جوبالىق كەڭسەنىڭ نەگىزگى مىندەتى – الماتى قالاسىنىڭ اۋماعىندا جاتاقحانالار سالۋ جانە ستۋدەنتتەردى تۇرعىن ۇيمەن قامتاماسىز ەتۋ بويىنشا مەملەكەتتىك باعدارلامانى ىسكە اسىرۋ ءۇشىن قولايلى جاعدايلار جاساۋ. جوبالىق كەڭسە اشىلعالى بەرى 120 الەۋەتتى ينۆەستور جۇگىندى، ونىڭ 67ء-ى ءقازىر جۇمىسقا كىرىسكەن، بۇل قولداۋ كورسەتۋ تەتىگىنىڭ تارتىمدىلىعىن كورسەتەدى.
