بۇل شامامەن 99%، ونىڭ ىشىندە 35 مىڭنان استام بالا الەۋمەتتىك وسال ساناتتا. بۇل ماقساتتا 209-دان استام مەكتەپ جانىنداعى جانە 20-دان استام قالا سىرتىنداعى لاگەرلەر جۇمىسى جوسپارلانۋدا. جازعى دەمالىس جايلى مالىمەتتەردى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ءبىلىم باسقارماسى باسشىسىنىڭ ورىنباسارى جانات ايتپايەۆا ايتىپ بەردى، دەپ حابارلايدى almaty-akshamy.kz
قالانىڭ 8 اۋدانىنىڭ اكىمدىكتەرىمەن مەكتەپ جانىنداعى لاگەر بالالارىنا تەاترلارعا، مۇراجايلارعا، كىتاپحانالارعا تەگىن بارۋ قاراستىرىلعان. سونىمەن قاتار، 750 بالانى قامتيتىن وقۋشىلار سارايىنىڭ "ورنەك" لاگەرى جاز بويى جۇمىس ىستەيتىن بولادى. دەمالىس كەزىنە بالالارعا ارنالعان سەكسيالار، كلۋبتار، ۇيىرمەلەر، ەڭبەك توپتارى، ەكسكۋرسيالار قاراستىرىلعان. ولارمەن 60 مىڭنان استام بالا قامتىلادى.
وقۋشىلار سارايىندا جانە 7 وقۋشىلار ۇيىندە 14 مىڭنان استام بالا سپورت سەكسيالارىمەن، تەحنيكالىق جانە كوركەمونەر ۇيىرمەلەرىمەن، سونداي-اق دويبى، شاحمات، ۇستەل تەننيسى، بوكس، كۇرەس، گيمناستيكا، دومبىرادا ويناۋدى ۇيرەنۋ، بي، فۋتبول جانە باسقا ويىندارمەن قامتىلادى. بۇدان باسقا، بالالارعا قوسىمشا ءبىلىم بەرۋگە ارنالعان مەملەكەتتىك تاپسىرىسقا سايكەس 86 جەكەمەنشىك قوسىمشا ءبىلىم بەرۋ ۇيىمدارىندا 5 500 قامتىلادى.
اۋلا كلۋبتارى كامەلەتكە تولماعانداردىڭ ىستەرى جونىندەگى بولىمشەلەردە پروفيلاكتيكالىق ەسەپتە تۇرعان، سونداي-اق قولايسىز جانە از قامتىلعان وتباسىلاردا تۇراتىن 8 500-گە جۋىق ءجاسوسپىرىمدى قامتيدى.جازعى دەمالىستى ۇيىمداستىرۋدىڭ جانە بالالاردىڭ قاۋىپسىزدىگىن قامتاماسىز ەتۋدىڭ ءبىرىڭعاي ءتاسىلىن قامتاماسىز ەتۋ ءۇشىن ءبىلىم باسقارماسىمەن ءبىلىم بەرۋ ۇيىمدارىنا نۇسقاۋلىق حات جولداندى، وندا مەكتەپ جانىنداعى لاگەرلەردى ۇيىمداستىرۋ بويىنشا ۇسىنىمدار، نۇسقاۋلىقتار، جادىنامالار بار، ولاردىڭ قىزمەتىن سانيتارلىق-مەديسينالىق جانە سانيتارلىق-گيگيەنالىق قامتاماسىز ەتۋگە قويىلاتىن تالاپتار ەنگىزىلدى.
يۋۆەنالدى پوليسيا تاراپىنان مەكتەپ جانىنداعى لاگەرلەرگە ينسپەكتورلار جولدانىپ، بالالاردىڭ جولداعى، سۋ قويمالارىنداعى قاۋىپسىزدىگى بويىنشا دارىستەر وتكىزەتىن بولادى.