بورىشكەرلەردىڭ بەرەشەگى 3،5 ملرد تەڭگەگە جەتكەن.
2023 جىلعا كولىك سالىعىن تولەۋ مەرزىمى بيىل 1 ساۋىردە اياقتالادى، دەپ حابارلايدى Almaty-akshamy.kz
زاڭناماعا سايكەس، سوت ورىنداۋشىلارى كولىك سالىعىن تولەمەگەن ازاماتتاردىڭ بانكتەگى شوتتارى مەن مۇلكىن بۇعاتتاۋعا قۇقىلى.
"سالىقتى ەسەپتەۋ كەزىندە 2023 جىلى قولدانىستا بولعان 3 450 تەڭگە مولشەرىندەگى ايلىق ەسەپتىك كورسەتكىش پايدالانىلادى. كولىككە سالىناتىن سالىق سوماسىن kgd.gov.kz پورتالىندا جانە "e–Salyq Azamat" ءموبيلدى قوسىمشاسىندا كالكۋلياتوردىڭ كومەگىمەن دەربەس ەسەپتەۋگە بولادى"، - دەلىنگەن حابارلامادا.
سونداي-اق ەسەپ ايىرىسۋ سالدوسىن ايقىنداۋ ماقساتىندا سالىق ورگاندارى جىل سايىن ءتيىستى جىلعا جەكە تۇلعالاردىڭ كولىك سالىعىن ەسەپتەيدى. سالىقتىڭ ەسەپتەلگەن سومالارى بويىنشا اقپارات 2024 جىلعى 15 ناۋرىزدان كەيىن كاسپي بانك جانە حالىق بانك ءموبيلدى قوسىمشالارىن پايدالانۋشىلارعا PUSH–حابارلاما تۇرىندە جىبەرىلەدى.
بۇدان بولەك سالىق سوماسى تۋرالى اقپارات kgd.gov.kz پورتالىندا "جەكە تۇلعالار ءۇشىن الداعى تولەمدەر" سەرۆيسىندە، سونداي-اق "e–Salyq Azamat" جانە كاسپي بانك پەن حالىق بانكتىڭ ءموبيلدى قوسىمشالارىندا جاريالانادى. ءموبيلدى قوسىمشالاردىڭ بارلىق پايدالانۋشىسى كولىك سالىعىنىڭ 2023 جىلعا ەسەپتەلگەن سومالارىن كورەدى جانە ونىڭ تولەمىن جاساي الادى.
مەملەكەتتىك كىرىستەر دەپارتامەنتى 2024 جىلعى 2 ساۋىردەن باستاپ سالىق سوماسىن ۋاقىتىلى تولەمەگەن جۇرگىزۋشىلەرگە سالىق بەرەشەگى تۋرالى حابارلاما جولدايدى.
1 اەك-تەن (3450 تەڭگە) استام بەرەشەك سوماسى بويىنشا حابارلاما تاپسىرىلعاننان كەيىن وتىز جۇمىس كۇنىنەن كەيىن جەكە تۇلعانىڭ بەرەشەگىن ءوندىرىپ الۋ تۋرالى سالىق بۇيرىعى اۆتوماتتى تۇردە قالىپتاستىرىلادى جانە بورىشكەرگە جىبەرىلەدى. بەرەشەك تاپسىرىلعاننان كەيىن 5 جۇمىس كۇنىنەن كەيىن تولەنبەگەن جاعدايدا، سالىق بۇيرىعى جەكە سوت ورىنداۋشىلارىنا ماجبۇرلەپ ءوندىرىپ الۋعا بەرىلەدى، دەپ ەسكەرتتى ۆەدومستۆوداعىلار.
جۇرگىزۋشىلەردىڭ كولىك سالىعى بويىنشا بەرەشەگى قانشا؟
مكد اقپاراتىنشا، 2024 جىلعى 28 اقپانداعى جاعداي بويىنشا 539 241 جەكە تۇلعانىڭ مۇلىك پەن كولىك سالىعى بويىنشا 16،3 ملرد تەڭگە بەرەشەگى بار. ونىڭ ىشىندە بەرەشەكتىڭ نەگىزگى سوماسى كولىك سالىعىن – 14،9 ملرد تەڭگەنى قۇرايدى.
كولىك سالىعىن تولەۋدەن جالتارعان اۆتوكولىك يەلەرىنىڭ ەڭ كوپ سانى مىنا وڭىرلەردە تىركەلگەن:
الماتى قالاسى – 26 مىڭ بورىشكەر بويىنشا بەرەشەك 3،5 ملرد تەڭگە؛
الماتى وبلىسى – 24 مىڭ بورىشكەر بويىنشا بەرەشەك 2،2 ملرد تەڭگە؛
استانا قالاسى – 20 مىڭ بورىشكەر بويىنشا بەرەشەگى 1،6 ملرد تەڭگە.
"زاڭناماعا سايكەس سوت ورىنداۋشىلارى بانكتىك شوتتار مەن مۇلىكتى بۇعاتتاۋعا قۇقىلى. سونداي-اق، بەرەشەك سوماسى 40 اەك-تەن اسقان كەزدە ەل اۋماعىنان شىعۋعا تىيىم سالىنۋى مۇمكىن"، - دەپ مالىمدەدى مەملەكەتتىك كىرىستەر دەپارتامەنتى.
سونىمەن قاتار، جەكە سوت ورىنداۋشىلارى بەرەشەكتەن بولەك قارىز سوماسىنىڭ 25%-ىنە دەيىنگى مولشەردە قوسىمشا اقى ءوندىرىپ الادى.
وسىعان بايلانىستى دەپارتامەنت قاجەتسىز شىعىندار مەن پروبلەمالاردى بولدىرماۋ ءۇشىن سالىقتى ۋاقىتىلى تولەۋگە، ال سالىق بەرەشەگى بولعان جاعدايدا جەكە سوت ورىنداۋشىلارىنا ءوندىرىپ الۋعا سالىق بۇيرىعى بەرىلگەن ساتكە دەيىن (مامىر ايىنىڭ ءۇشىنشى ونكۇندىگىنە دەيىن) سالىق پەن ءوسىمپۇلدى تولەۋگە كەڭەس بەرەدى.