«قازگيدرومەت» ماماندارى 24-26 شىلدە ارالىعىندا الماتىدا سىناپ باعاناسى 35-38 گرادۋسقا دەيىن كوتەرىلەدى دەپ بولجاۋدا.
كۇن قاتتى ىستىق بولۋ ىقتيمالدىعى جوعارى. الماتى قالاسىنىڭ توتەنشە جاعدايلار دەپارتامەنتى قالادا ءورت ءقاۋىپى ساقتالاتىنىن مالىمدەدى، دەپ حابارلايدى Almaty-akshamy.kz.
وسىعان بايلانىستى ۆەدومستۆو تومەندەگى قاۋىپسىزدىك شارالارىن ساقتاۋدى ۇسىنادى:
- تاۋعا دەمالۋعا بارعان جاعدايدا تۇتانعان تەمەكى قالدىقتارىن تاستاماڭىز؛
- ءبىر جەلىگە بىرنەشە ەلەكتر قۇرىلعىنى قوسپاڭىز، ويتكەنى ەلەكتر جەلىسىنىڭ شامادان تىس جۇكتەلۋى قىسقا تۇيىقتالۋعا جانە ورتكە اكەلۋى مۇمكىن؛
- بالالاردى كولىكتىڭ ىشىنە از ۋاقىتقا بولسا دا قالدىرۋعا بولمايدى؛
- كۇن ساۋلەسى تىكەلەي تۇسەتىن جەرلەردە مۇمكىندىگىنشە از بولۋعا تىرىسىڭىز.
ءورت ءقاۋىپتى كەزەڭدە الماتى قالاسى تجد الدىن الۋ شارالارىن كۇشەيتتى.
«تاۋلى-ورماندى جەرلەردە ءورتتىڭ الدىن الۋ ماقساتىندا بەكىتىلگەن پاترۋلدەۋ كەستەسىنە سايكەس دەمالىس جانە مەرەكە كۇندەرى ورمان شارۋاشىلىعى مەكەمەلەرى مەن جپق وكىلدەرىمەن بىرلەسكەن رەيدتىك ءىس-شارا وتكىزەدى»، دەپ حابارلادى دەپارتامەنتتەن.