2023 جىلدىڭ 17-21 شىلدە ارالىعىندا قازاقستان رەسپۋبليكاسى پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەلەرى ق ر ۇقك شەكارا اكادەمياسىنىڭ كۋرسانتتارىنا ارنالعان لاگەردە بولىپ، ءۇش كۇننەن بەرى شەكاراشىلاردىڭ تاۋلى دايىندىق ساباعىنا قاتىستى.
ءماجىلىس دەپۋتاتتارى م.روجين، و.قۇسبەكوۆ، ب.كەرىمبەك جانە س.نۇرتازا كۋرسانتتار مەن بىرگە اپتا بويى ولاردىڭ تىككەن شاتىرلارىندا تۇردى. وسىلايشا، ءبىر ءسات اق كويلەك گارا گالستۋكتەرىن شەكاراشى كيىمىنە الماستىرعان دەپۋتاتتار، تاۋلى دايىندىق ساباقتارىنا بەلسەنە ارالاسىپ، 3954 مەتر بيىكتىكتەگى «پيك-تۋريست» شىڭىنا شىقتى، دەپ حابارلايدى Almaty-akshamy.kz.
ايتا كەتۋ كەرەك، دەپۋتاتتتاردىڭ جازعى دامالىسىن قيىپ، وقۋ-جاتتىعۋعا ارنالعان لاگەرلەرگە اتتانۋىنا تۇرعىنداردان كەلىپ تۇسكەن ارىز، تالاپتار سەبەپ بولعان ەكەن. ەندى ولار ەكى اپتا بويى كۋرسانتتار مەن ساربازدار اراسىندا ءجۇرىپ، سالاداعى پروبلەمالار مەن قوردالانعان ماسەلەلەردى انىقتاپ، ولاردىڭ شەشىلۋىنە سەپ بولاتىن زاڭ جوباسىن، ازىرلەۋگە اتسالىسپاق.
حالىق قالاۋلىلارىنىڭ ايتۋىنشا، مەملەكەتتىك شەكاراداعى شەكاراشىلاردىڭ جاي-كۇيىن پارلامەنت كرەسلوسىندا وتىرىپ تالقىلاعاننان كورى، ولارمەن بىرگە تۇرىپ شەكاراشى كەيىپىنە ەنۋدى ءجون كورگەن. ياعني، اۋا-رايىنىڭ ىستىق-سۋىعىنا قاراماي، تاۋلى ايماقتا ەرتە تۇرىپ، تاكتيكالىق تاپسىرمالار مەن جاۋىنگەرلىك دايىندىقتان وتكەن.
«مەملەكەت - شەكارادان باستالادى. كۋرسانتتاردىڭ دايىندىعى جاقسى ەكەن. وتان يگىلىگى ءۇشىن ادال قىزمەت ەتۋگە ساقاداي ساي ەكەنىنە كوزىمىز جەتتى. ءبىز مۇندا تاۋلى ايماقتاعى شەكارانى قورعاۋدىڭ قىر-سىرىنا قانىقتىق. مەنىڭ ويىمشا، بۇل وتە كۇردەلى دە ناعىز ەرلەرگە لايىق جۇمىس. مۇنداي تاۋلى دايىندىق ساباقتارىنان كوپ نارسەنى ۇيرەنۋگە بولادى»، - دەيدى ب ا ق وكىلدەرىنە بەرگەن سۇقباتىندا م.روجين.
شەكاراشى كۋرسانتتاردىڭ تاۋلى دايىندىق ساباقتارى مەن قاتار تۇرمىس-تىرشىلىگىن زەردەلەگەن ءماجىلىس دەپۋتاتتارى اسكەري قىزمەتشىلەرمەن اڭگىمەلەسىپ، ماتەريالدىق-تەحنيكالىق قامتاماسىز ەتۋ، ەڭبەك اقى جانە باسقا دا ءبىرقاتار جۇيەلى ماسەلەلەردى انىقتادى.
شەكاراشى كۋرسانتتاردىڭ تىنىس-تىرشىلىگىن كوزبەن كورىپ، كوڭىلگە تۇيگەن و.قۇسبەكوۆ: «تاڭاتپاستان ەرتە ويانۋ، قولايلى جاعدايدىڭ ءماز ەمەستىگى وسىنىڭ ءبارى بۇگىنگى شەكاراشىلاردىڭ جاي-كۇيى. بۇل سابىرلىلىققا، توزىمدىلىككە تاربيەلەيدى. اسكەري قىزمەت – ۇلدارىمىزدى ەر-ازامات قىلىپ تاربيەلەيتىن پاتريوتتىق ورتا. جاۋاپكەرشىلىكتىڭ، ءتارتىپتىڭ نە ەكەنىن ءتۇسىنۋدىڭ جالعىز جولى»، - دەيدى.
ەلورداعا ءار سارباز بەن ءار سارداردىڭ ماسەلەسىن بۇگە-شىگەسىنە دەيىن جەتكىزەمىز دەپ وتىرعان ماجىلىسمەندەر شەكاراشىلاردىڭ تۇرعىن ءۇي، الەۋمەتتىك قامسىزداندىرۋ جاعىنا دا اسا نازار اۋداردى. ولاردىڭ پىكىرىنشە، ءار زاستاۆا ەكيپاجسىز ۇشاتىن ۇشاقتار مەن زاماناۋي قارۋ-جاراقتار، جەر تالعامايتىن كولىكتىڭ بولعانى دۇرىس ەكەن.
جيىن بارىسىندا دەپۋتاتتار ۇلتتىق قاۋىپسىزدىك جۇيەسىن جەتىلدىرۋگە باعىتتالعان جاڭا زاڭنامالىق باستامالار مەن شارالاردى، جاستاردى وتانسۇيگىشتىككە تاربيەلەۋدەگى تاسىلدەردى، شەكاراشىلار ساپىندا قىزمەت ەتۋ جاعدايلارىن جاقسارتۋ قاجەتتىلىگىن زەردەلەۋگە ەرەكشە نازار اۋداردى.
تاۋداعى شەكاراشى كۋرسانتتاردىڭ جاي-كۇيىمەن جاقىننان تانىسىپ بولعان دەپۋتاتتار شەكارا اكادەمياسىنا كەلىپ، عاسىرعا جۋىق وقۋ ورداسىنىڭ تىنىس-تىرشىلىگىمەن تانىستى.
مۇندا دەپۋتاتتاردى شەكارا اكادەمياسىنىڭ باستىعى پولكوۆنيك پ.پوليۆانوۆ قارسى الىپ، ءماجىلىس زالىنا الىپ كىردى. اكادەميا باسشىلىعى مەن بولعان جينالىستا تاۋداعى كورگەن-بىلگەندەرىن ورتاعا سالعان دەپۋتاتتار شەكاراشى ماماندىعىنىڭ وڭاي شاعىلاتىن جاڭعاق ەمەس ەكەنىنە كوزى جەتكەندەي.
جينالىس بارىسىندا دەپۋتاتتار اكادەميا باستىعىنا كۋرسانتتاردىڭ ناعىز شەكاراشى، وتانعا قىزمەتتى - ابىرويلى مىندەت دەپ تۇسىنەتىنىن، الداعى ۋاقىتتا ءوز ءىسىنىڭ مايتالمان مامانى بولىپ شىعاتىندارىنا سەنىم ءبىلدىردى. سودان كەيىن كوزبەن كورىپ، كوڭىلگە تۇيگەن ءبىرقاتار ماسەلەلەردى تالقىلاعان ءماجىلىس دەپۋتاتتارى ودان ءارى شەكارا اكادەمياسىنىڭ بىرنەشە قۇرىلىمدىق بولىمدەرىنە باس سۇقتى.
ءوز كەزەگىندە كينولوگتار شەكارالىق باقىلاۋ كافەدراسىندا دەپۋتتاردىڭ بىرىنە ەسىرتكى جاسىرىپ، قىزمەت ءيتىنىڭ كومەگىنە جۇگىندى. ونداعى ماقسات - مەملەكەتتىك شەكارادا قىزمەت ءيتىنىڭ تاپتىرماس دوس، ادامعا ادال سەرىك ەكەنىن كورسەتۋ. سۋداي جاڭا 3-ارنايى كافەدراسىنىڭ اكىمشىلىك عيماراتىنداعى جانعا جايلى زاماناۋي ۇلگىدە جابدىقتالعان سالقىن كابينەتتەردى ارالاپ كورگەن جۇمىس توبى، مۇنداعى جاڭا زاتتار مەن اۋلاداعى وقۋ كورپۋستارىنا شىن مانىندە قاتتى قىزىعۋشىلىق تانىتتى. كافەدرا كابينەتتەرىن وزدەرىنىڭ ماجىلىستەگى كابينەتتەرىمەن سالىستىردى. مۇنداعى بولمەلەردىڭ الدە قايدا كەڭ، ءارى جارىق جاقسى جابدىقتالعانىن جاسىرمادى.
اكادەمياداعى كۋرسانتتار ءۇشىن جاسالعان وسىنشاما جاعداي دەپۋتتاردى بەي-جاي قالدىرمادى. اسىرەسە، «بوينگ-747» ماكەتى ورنالاسقان سيمۋلياتورداعى ۇشاقتىڭ كانىگى ۇشاقتان ەش ايىرماشىلىعى جوق ەكەنىن تىلگە تيەك ەتكەن دەپۋتاتتار، شەكاراشى كۋرسانتتاردىڭ مىقتى وقۋ بازاسىمەن قامتاماسىز ەتىلگەنىن ءسوز ەتتى.
شارا سوڭىندا قازاقستان رەسپۋبليكاسى پارلامەنتى ءماجىلىسىنىڭ VIII شاقىرىلىمىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان ارىپتەستەرىنىڭ جازعى دەمالىسقا قاراماي، بىلەكتەرىن سىبانىپ جەلدىڭ وتىندەگى شەكارا شەبىنە اتتانىپ كەتكەنىن ەرەكشە اتاپ ءوتتى.
شەكارا اكادەمياسىنىڭ باستىعى پولكوۆنيك پ.پوليۆانوۆ دەپۋتاتتاردىڭ الداعى قىزمەتىنە ساتتىلىك تىلەپ، تاۋلى دايىندىق ساباقتارىنان جوعارى دەڭگەيدە وتكەنى تۋرالى ارنايى سەرتيفيكات پەن وقۋ ورداسىنىڭ تاريحىنان سىر شەرتەتىن قۇندى كىتاپتى سالتاناتتى تۇردە تابىس ەتتى.