بۇل تاجىريبە بىرنەشە جىل بۇرىن قالالىق سپورت باسقارماسىنىڭ باستاماسىمەن مەگاپوليستە پايدا بولدى. بۇگىن «ەڭبەك» باعدارلاماسى اياسىندا 22 مامان جۇمىسقا كىرىستى، ولار 500-گە جۋىق بالانى وقىتادى.
الماتى قالالىق سپورت باسقارماسىنىڭ باسشىسى رۇستەم بايسەيىتوۆ بۇل جۇمىستىڭ قالاي ۇيىمداستىرىلعانىن ايتتى، دەپ حابارلايدى Almaty-akshamy.kz
رۇستەم بايسەيىتوۆ اتاپ وتكەندەي، الماتىنىڭ التى اۋدانىندا جەكپە-جەكتى وقىتۋ ورتالىقتارى اشىلدى. جاتتىعۋلاردى بالالار مەن جاسوسپىرىمدەر سپورت مەكتەبىنىڭ 14 جاتتىقتىرۋشىسى جۇرگىزەدى. سونىمەن قاتار قالانىڭ 8 اۋدانىنداعى 50 دەمالىس ورتالىعىندا سپورت سەكسيالارى مەن ۇيىرمەلەرى اقىسىز جۇمىس جاسايدى، ولاردا 5 280 ادام قامتىلعان.
سپورت باسقارماسىنىڭ باسشىسى 2023 جىلعا قاراي قالاداعى ورتالىقتاردى 200-گە دەيىن جەتكىزۋ جوسپارلانىپ وتىرعانىن، بيىل قوسىمشا 50 ورتالىق اشىلاتىنىن ايتتى.
رۇستەم بايسەيىتوۆ الماتىلىق مەكتەپ وقۋشىلارىنىڭ جازعى دەمالىس كەزىندە سپورتتىق ومىرگە قالاي تارتىلعانىن ايتىپ بەردى.
«بيىل 8-12 جاس ارالىعىنداعى بالالارعا ءجۇزۋ نەگىزدەرى بويىنشا تەگىن وقىتۋدىڭ قالالىق باعدارلاماسى قولدانىلدى. بارلىعى 2100 بالا قامتىلدى، ونىڭ ىشىندە بالالار ءۇيىنىڭ تاربيەلەنۋشىلەرى دە بار. سونداي-اق، الماتى قالاسىنىڭ اۋلالىق كوماندالارى اراسىندا 4500-دەن استام بالانى قامتيتىن فۋتبول ليگالارى ۇيىمداستىرىلدى»، - دەدى رۇستەم بايسەيىتوۆ.
