مەملەكەت باسشىسى قاسىم-جومارت توقايەۆ 2025 جىلدى «جۇمىسشى ماماندىقتارى جىلى» دەپ جاريالادى. بۇل – ەل ەكونوميكاسىن نىعايتۋداعى ستراتەگيالىق قادام. باستاما تەحنيكالىق جانە كاسىپتىك ءبىلىم بەرۋدىڭ ماڭىزدىلىعىن ارتتىرىپ، جۇمىسشى ماماندىقتارىنىڭ بەدەلىن كوتەرۋگە باعىتتالعان.
بۇگىنگى تاڭدا ەكونوميكانىڭ بارلىق سالالارىندا بىلىكتى ماماندارعا سۇرانىس جوعارى. قۇرىلىس، ونەركاسىپ، كولىك، قىزمەت كورسەتۋ جانە باسقا دا سالالاردا كاسىبي شەبەرلىگى جوعارى ماماندار قاجەت. سوندىقتان تەحنيكالىق جانە كاسىپتىك ءبىلىم بەرۋ ۇيىمدارىنىڭ الدىندا ۇلكەن مىندەتتەر تۇر.
«الماتى جولاۋشىلار كولىگى جانە تەحنولوگيالار كوللەدجى» – ەلىمىزدىڭ تەحنيكالىق جانە كاسىپتىك ءبىلىم بەرۋ جۇيەسىندەگى بەدەلدى وقۋ ورىندارىنىڭ ءبىرى. كوللەدج 2013 جىلى قۇرىلىپ، بۇگىنگى تاڭدا ەڭبەك نارىعىنىڭ تالاپتارىنا ساي جوعارى بىلىكتى جۇمىسشى ماماندارىن دايارلاۋمەن اينالىسىپ كەلەدى.
كوللەدجدىڭ باستى ماقساتى – ءبىلىم الۋشىلارعا ساپالى ءبىلىم بەرىپ قانا قويماي، ولاردىڭ كاسىبي داعدىلارىن دامىتۋ، بولاشاق مامان رەتىندە قالىپتاسۋىنا جاعداي جاساۋ. سوندىقتان مۇنداعى ءبىلىم بەرۋ ءۇردىسى دە جاڭا زامان تالاپتارىنا ساي جۇرگىزىلەدى. ءبىلىم الۋشىلار تەوريالىق ءبىلىمدى تاجىريبەمەن ۇشتاستىرىپ، وندىرىستىك تاجىريبەدەن وتەدى. كوللەدج نارىقتا سۇرانىسقا يە جۇمىسشى ماماندىقتارىن دايارلايدى. ماسەلەن، شاشتاراز ونەرى – ءسان يندۋسترياسىندا سۇرانىسقا يە ماماندىق. ءبىلىم الۋشىلار مۇندا شاش قيۋ، بوياۋ، ساندەۋ ادىستەرىن مەڭگەرەدى. سونداي-اق، ەلەكتر جابدىقتارى ماماندارىن دايارلاۋ باعدارى ەلەكتر قۇرىلعىلارىن جوندەۋ، تەحنيكالىق قىزمەت كورسەتۋ سياقتى داعدىلاردى ۇيرەتەدى. توكار ءىسى – مەتالل وڭدەۋ، ءارتۇرلى بولشەكتەردى دايىنداۋ بويىنشا بىلىكتى مامانداردى دايارلاسا، دانەكەرلەۋ ءىسى – ءوندىرىستىڭ بارلىق سالاسىندا قاجەتتى ماماندىق، ءبىلىم الۋشىلار مەتالل قۇرىلىمدارىن دانەكەرلەۋدى ۇيرەنەدى. اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ – كولىك جوندەۋ سالاسىندا اسا سۇرانىسقا يە مامانداردى دايىندايدى. ماسەلەن، اۆتوموبيل جوندەۋ بويىنشا سلەسار – كولىكتەردىڭ اقاۋلارىن انىقتاپ، جوندەۋگە باعىتتالعان ماماندىق. اۆتوموبيل كولىگىن جوندەۋ شەبەرى – اۆتوكولىك دياگنوستيكاسى، تەحنيكالىق قىزمەت كورسەتۋ بويىنشا ءبىلىم بەرەدى. كوللەدجدىڭ «تىگىن ءوندىرىسى جانە كيىم ۇلگىلەۋ» ءبولىمى ءسان سالاسىنا قاجەت مامانداردى دايىندايدى. ءبىلىم الۋشىلار كيىم ۇلگىسىن جاساۋدى، تىگۋدى، ساندىك ارلەۋدى ۇيرەنەدى.
تۇلەكتەرىمىز تابىستى ەڭبەك ەتىپ ءجۇر
كوللەدجىمىز زاماناۋي ماتەريالدىق-تەحنيكالىق بازاعا يە، وقۋ شەبەرحانالارى، زەرتحانالار، تاجىريبەلىك ساباقتارعا ارنالعان ارنايى كابينەتتەر بار، زاماناۋي قۇرالدارمەن جابدىقتالعان. جوعارى بىلىكتى وقىتۋشىلار، تاجىريبەلى ۇستازدار مەن ءوندىرىس سالاسىنىڭ ماماندارى ءدارىس بەرەدى.
ءبىلىم الۋشىلار كاسىبي ماشىقتارىن ارتتىرۋ ءۇشىن ءىرى كاسىپورىندار مەن شەبەرحانالاردا وندىرىستىك تاجىريبەدەن وتەدى. قازىرگى تاڭدا تۇلەكتەرىمىز ءوندىرىس ورىندارىندا، قىزمەت كورسەتۋ سالالارىندا، جەكە كاسىپكەرلىك باعىتىندا تابىستى جۇمىس ىستەپ ءجۇر. ولار ءتۇرلى جارىستار مەن وليمپيادالارعا قاتىسىپ، ءوز بىلىمدەرىن جەتىلدىرە الادى.
بۇگىندە جۇمىسشى ماماندىقتارى – ەل دامۋىنىڭ باستى تىرەگى. ەكونوميكانىڭ تۇراقتىلىعى مەن حالىقتىڭ ءال-اۋقاتى جوعارى بىلىكتى ماماندارعا تىكەلەي بايلانىستى. الماتى جولاۋشىلار كولىگى جانە تەحنولوگيالار كوللەدجى وسى مىندەتتى ابىرويمەن اتقارىپ، ەلدىڭ ەڭبەك نارىعىنا قاجەتتى مامانداردى دايارلاپ كەلەدى. ءبىز ءبىلىم الۋشىلارىمىزدىڭ ساپالى ءبىلىم الىپ، زاماناۋي تەحنولوگيالاردى مەڭگەرۋىنە، ءوز ءىسىنىڭ شەبەرى اتانۋىنا بارلىق جاعداي جاسايمىز. تۇلەكتەرىمىز – ەل ەكونوميكاسىنىڭ قوزعاۋشى كۇشى، قوعامنىڭ سۇرانىسىنا يە ماماندار.
جۇمىسشى ماماندىعىن يگەرۋ – تابىستى بولاشاققا جول اشۋ. ءوز ءىسىن جەتىك مەڭگەرگەن، كاسىبي شەبەرلىگى جوعارى ماماندار عانا ەلىمىزدىڭ ءوندىرىسىن العا جىلجىتىپ، جاڭا بەلەستەردى باعىندىرادى.