الماتىدا «تۋبەركۋلەزسىز ورتالىق ازيا: ۇلتتىق جەتىستىكتەردەن وڭىرلىك كوشباسشىلىققا» اتتى حالىقارالىق كونفەرەنسيا جانە شىعىس ەۋروپا مەن ورتالىق ازياداعى تۋبەركۋلەزگە ارنالعان پارلامەنتتىك سامميت ءوتتى، دەپ حابارلايدى aqshamnews.kz دسم-نە سىلتەمە جاساپ.
ءىس-شاراعا ءوڭىر ەلدەرىنىڭ پارلامەنت دەپۋتاتتارى، دەنساۋلىق ساقتاۋ مينيسترلىكتەرىنىڭ وكىلدەرى، ددسۇ، Stop TB سەرىكتەستىگى جانە وزگە دە حالىقارالىق ۇيىمداردىڭ ساراپشىلارى قاتىستى. جيىندا بۇۇ-نىڭ تۋبەركۋلەزگە قارسى ساياسي دەكلاراسياسىن (2023 ج.) ىسكە اسىرۋ بارىسى، ازاماتتىق قوعامنىڭ ءرولى جانە جاڭا تەحنولوگيالار تالقىلانعان.
«فورۋم قورىتىندىسىندا 2026-2028 جىلدارعا ارنالعان تۋبەركۋلەزگە قارسى كۇرەستى جەدەلدەتۋ جونىندەگى وڭىرلىك قارار قابىلداندى. ونىڭ باستى ماقساتى – 2030 جىلعا قاراي تۋبەركۋلەزدى تۇبەگەيلى جويۋ»، - دەپ حابارلايدى مينيسترلىك.
ق ر دەنساۋلىق ساقتاۋ مينيسترلىگىنىڭ ءبىرىنشى ۆيسە-مينيسترى تيمۋر سۇلتانعازييەۆتىڭ ايتۋىنشا، بۇل قارار ارقىلى ورتالىق ازيا ەلدەرى تۋبەركۋلەزدى جويۋدا كوشباسشىعا اينالا الادى.
مينيسترلىكتىڭ مالىمەتىنشە، قازاقستان بۇۇ قويعان تۋبەركۋلەز بويىنشا نەگىزگى كورسەتكىشتەرگە مەرزىمىنەن بۇرىن قول جەتكىزدى. 2024 جىلى ەلىمىزدە وسى دەرتتى جۇقتىرعانداردىڭ سانى 4%، ءولىم-جىتىم 16،6% تومەندەگەن. العاش رەت تۋبەركۋلەزدەن بالا ءولىمى تىركەلمەدى. بۇل جەتىستىك سوڭعى دياگنوستيكالىق ادىستەردى ەنگىزۋ جانە تابلەتكامەن ەمدەۋ رەجيمىنىڭ ارقاسىندا مۇمكىن بولدى.
سونداي-اق امبۋلاتورلىق ەم الىپ جۇرگەن ناۋقاستاردىڭ 99%-ى الەۋمەتتىك كومەكپەن قامتىلعانى اتاپ ءوتىلدى. قازاقستان ۇەۇ-عا ارنالعان مەملەكەتتىك تاپسىرىس كولەمىن ءبىر جارىم ەسەگە ارتتىردى. دەگەنمەن، وسال توپتارمەن جۇمىس پەن ازاماتتاردىڭ دەنساۋلىعىنا دەگەن جاۋاپكەرشىلىگىن كۇشەيتۋ قاجەت ەكەنى ايتىلدى.
«ساياسي ەرىك – تۋبەركۋلەزبەن كۇرەستىڭ ەڭ كۇشتى قۇرالى. ءبىز 2030 جىلعا قاراي بۇل دەرتتى جويۋعا مىندەتتىمىز»، – دەيدى Global TB Caucus ۇيىمىنىڭ ءتوراعا ورىنباسارى، دەپۋتات گۇلدارا نۇرىموۆا.