الماتىنىڭ قالالىق موبيلدىلىك باسقارماسى بۇل جولايىرىقتىڭ جاعدايىنا قاتىستى ب ا ق مەن الەۋمەتتىك جەلىلەردە ايتىلعان پىكىرلەرگە بايلانىستى تۇسىنىكتەمە بەردى.
باسقارما باسشىسى ساعىندىق تەلىبايەۆتىڭ ايتۋىنشا، بۇل جولايرىق 2005 جىلى سالىنعان جانە پايدالانۋعا بەرىلگەن ساتتەن باستاپ ونىڭ تىرەك قۇرىلىمدارىنىڭ جاعدايى تۇراقتى تۇردە باقىلاۋعا الىنىپ كەلەدى. 2016، 2020 جانە 2023 جىلدارى جۇرگىزىلگەن تەكسەرىستەردە اقاۋلار انىقتالماعان.
«2024 جىلدىڭ قاراشا ايىندا جۇرگىزىلگەن تەكسەرىس ناتيجەسىندە كوپىر قۇرىلىمدارىنىڭ بەتون بەتىندە اقاۋلاردىڭ پايدا بولۋىنا، جول جامىلعىسىنداعى دەفورماسيالىق جىكتەر مەن اسفالت-بەتون جابىندىسىنىڭ جوندەۋدى قاجەت ەتۋىنە بايلانىستى كۇردەلى جوندەۋ جۇرگىزۋ تۋرالى شەشىم قابىلداندى. بيىل اقپان ايىندا كۇردەلى جوندەۋگە ارنالعان جوبالىق-سمەتالىق قۇجاتتامانى ازىرلەۋ بويىنشا مەردىگەر ۇيىممەن كەلىسىمشارت جاسالدى. جوندەۋ جۇمىستارى 2026 جىلى باستالادى»، – دەدى باسقارما باسشىسى.
ونىڭ ايتۋىنشا، بيىل ناۋرىز ايىندا تەحنيكالىق قىزمەت جولايرىققا اسپاپتىق تەكسەرۋ جۇرگىزىپ، ارنايى داچيكتەر ورناتتى. بۇل تەكسەرىس تە نورماتيۆتەن تىس دەفورماسيا انىقتامادى.
سونىمەن قاتار، جولايرىقتىڭ قازىرگى جاعدايىن ساقتاۋ ءۇشىن ونىڭ كەيبىر ەلەمەنتتەرىن ۋاقىتشا قورعاۋ (كونسەرۆاسيا) جۇمىستارى جۇرگىزىلەدى. اتاپ ايتقاندا: ەستاكادانىڭ ارالىق تىرەگىندەگى ريگەلدىڭ كونسولدى بولىگىن ارنايى قۇراممەن سىلاپ جوندەۋ، تىرەكتى قوسىمشا ارماتۋرالاۋ جانە بەتىن بەتونداۋ ارقىلى جوندەۋ، وڭتۇستىك باعىتتاعى بۇرىلىستاعى ارالىق تىرەكتىڭ كونسولدى بولىگىن ارنايى قۇراممەن جوندەۋ جوسپارلانعان.
«الاڭداۋعا نەگىز جوق، بۇگىنگى كۇنى نىساننىڭ بۇتىندىگىنە ەش ءقاۋىپ ءتونىپ تۇرعان جوق. كۇردەلى جوندەۋ باستالعانعا دەيىن تەحنيكالىق قىزمەت اي سايىن جولايىرىقتى تەكسەرىپ وتىرادى»، – دەپ ءسوزىن تۇيىندەدى ساعىندىق تەلىبايەۆ.