بۇگىنگى تاڭدا الماتى قالاسىنىڭ اكىمدىگى 144 قالالىق جانە 34 قالا ماڭىنداعى مارشرۋتتاردى ۇيىمداستىردى. اتالمىش باعىتتاردا 2326 جىلجىمالى قۇرام بار. جىل باسىنان بەرى حالىق سانىنىڭ وسۋىنە بايلانىستى 22 جاڭا باعىت ۇيىمداستىرىلىپ، 23 مارشرۋتتا جىلجىمالى قۇرام جاڭارتىلدى. بۇل تۋرالى الماتى اكىمى ەربولات دوسايەۆ وكق بريفينگى بارىسىندا ب ا ق وكىلدەرىنىڭ سۇراقتارىنا وراي بەرگەن جاۋابىندا ايتتى.
سونداي-اق، قالا باسشىسى مەملەكەت باسشىسىنىڭ 2025 جىلعا دەيىن قوعامدىق كولىكتى ەكولوگيالىق وتىنعا كوشىرۋ جونىندەگى تاپسىرماسىن ورىنداۋ اياسىندا الماتى اكىمدىگى مەن جەكە تاسىمالداۋشىلار گازبەن جانە ەلەكترمەن جۇرەتىن اۆتوبۋستاردى بەلسەندى تۇردە ساتىپ الۋ جۇمىستارى ءجۇرىپ جاتقانىن باياندادى.
ماسەلەن، 2023 جىلى بيۋدجەت قاراجاتى ەسەبىنەن كوممۋنالدىق اۆتوپارك ءۇشىن 600 گازبەن جۇرەتىن اۆتوبۋس ساتىپ الىندى. بۇگىندە 430 اۆتوبۋس كەلدى. وعان 60 ملرد تەڭگە جۇمسالدى. ونىڭ كوپ بولىگى قالاعا جەلتوقسان ايىنىڭ باسىندا اكەلىندى. قالعان 170ء-ى اعىمداعى جىلدىڭ سوڭىنا دەيىن جەتكىزىلەدى.
بريفينگ بارىسىندا ءجۋرناليستىڭ №32 باعىتقا قاتىستى سۇراعىنا الماتى اكىمى اتالمىش باعىت بويىنشا ءقازىر جەلىدە 15 اۆتوبۋس جولاۋشى تاسىمالدايتىنىن ايتتى. ال 27 جەلتوقساننان باستاپ قوسىمشا اۆتوبۋستار، ياعني 25 اۆتوبۋس 7-8 مينۋت ارالىقپەن جەلىگە شىعاتىن بولادى.
جالپى، 2024 جىلى 1000 گازبەن جۇرەتىن اۆتوبۋس، 100 ەلەكتروبۋس جانە 100 تروللەيبۋس ساتىپ الۋ جوسپارلانۋدا. وسىلايشا، تروللەيبۋس پاركى تولىعىمەن جاڭارتىلادى.
«بۇل باعىتتاعى جۇمىستار جالعاسۋدا. 2025 جىلعا قاراي اۆتوبۋس پاركتەرى 100% ەكولوگيالىق كولىك تۇرلەرىنە اۋىستىرىلادى. ءقازىر قالادا 800-1000 اۆتوبۋس جەتىسپەيدى. ەگەر قوسىمشا تابىس بولسا، جاڭا اۆتوبۋستار ساتىپ الامىز. وسىلايشا ءبىز جولاۋشىلار تاسىمالى قىزمەتىنىڭ ساپاسىن جاقسارتقىمىز كەلەدى. جىلدام جەتكىزەتىن قوعامدىق كولىك ورتا مەرزىمدى پەرسپەكتيۆادا الماتى قالاسىنداعى كولىك جۇيەسىنىڭ نەگىزى بولادى دەپ ويلايمىن»، - دەدى ەربولات دوسايەۆ.