دارى-دارمەكتەردى جەتكىزۋ قاڭتار ايىنىڭ ورتاسىنان باستاپ بەكىتىلگەن كەستە بويىنشا باستالدى. بۇل تۋرالى وڭىرلىك كوممۋنيكاسيالار قىزمەتىنىڭ الماتى قالاسى الەۋمەتتىك مەديسينالىق ساقتاندىرۋ قورى فيليالىنىڭ ديرەكتورى تىلەۋحان ابىلدايەۆتىڭ قاتىسۋىمەن وتكەن باسپا ءسوز كونفەرەنسياسى بارىسىندا بەلگىلى بولدى، دەپ حابارلايدى اlmaty-akshamy.kz
سپيكەر تەگىن دارى-دارمەكپەن بيۋدجەت قاراجاتى ەسەبىنەن تمككك شەڭبەرىندە 35 نوزولوگيا بويىنشا ديسپانسەرلىك ەسەپتە تۇرعان پاسيەنتتەر، سونداي-اق ءمامس پاكەتىندە 41 نوزولوگيا بويىنشا ەرەسەكتەر، 63 نوزولوگيا بويىنشا بالالار قامتاماسىز ەتىلەتىنىن حابارلادى.
سونىمەن قاتار، دارى-دارمەكتەرمەن قان اينالىمى جۇيەسى، اس قورىتۋ ورگاندارى، قان ءوندىرۋ ورگاندارى، ەندوكريندىك جۇيە اۋرۋلارى، تاماقتانۋ جانە زات الماسۋدىڭ بۇزىلۋى، سۇيەك-بۇلشىق ەت جۇيەسى جانە جۇيكە جۇيەسى اۋرۋلارى، پسيحيكالىق اۋىتقۋشىلىق، كەيبىر ينفەكسيالىق جانە پارازيتتىك اۋرۋلار، ىسىكتەر، تىنىس الۋ ورگاندارىنىڭ اۋرۋلارى، نەسەپ-جىنىس جۇيەسى جانە ت.ب اۋرۋلارى بار پاسيەنتتەر قامتاماسىز ەتىلەدى.
مىسالى، 2021 جىلى تمككك جانە ءمامس شەڭبەرىندە پاسيەنتتەردى امبۋلاتوريالىق دەڭگەيدە قامتاماسىز ەتۋ ءۇشىن 24،8 ملرد تەڭگە سوماسىندا قارجىلاندىرۋ ءبولىندى. تمككك اياسىندا – 219 مىڭنان استام پاسيەنت، ءمامس پاكەتى شەڭبەرىندە – 26 مىڭنان استام ەرەسەك پاسيەنت، سونداي-اق 40 مىڭنان استام بالا قامتاماسىز ەتىلدى.
«2022 جىلعا 20 ملرد تەڭگەدەن استام سوماعا دارى-دارمەك ساتىپ الۋعا وتىنىمدەر كەلىسىلدى. ولار بويىنشا جەتكىزۋ قاڭتاردىڭ ورتاسىنان باستاپ بەكىتىلگەن كەستە بويىنشا باستالدى»، - دەپ اتاپ ءوتتى ت. ابىلدايەۆ.
قاجەت بولعان جاعدايدا پاسيەنتتەر 1439 قىسقا ءنومىرى بويىنشا تەگىن دارى-دارمەكپەن قامتاماسىز ەتۋ ماسەلەلەرى بويىنشا سك-فارماسيانىڭ بايلانىس ورتالىعىنا حابارلاسا الادى، قالالىق جانە ۇيالى تەلەفوندار ءۇشىن قولجەتىمدى. بارلىق قوڭىراۋلار تەگىن.
بايلانىس ورتالىعىنىڭ وپەراتورلارى جۇگىنگەن پاسيەنتتەرگە تەگىن ءارى قاجەتتى دارى-دارمەكتەردى جەتكىزۋ مەرزىمدەرى مەن كۇندەرى تۋرالى اقپارات بەرەدى.