بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا الماتى قالاسى الەۋمەتتىك مەديسينالىق ساقتاندىرۋ قورى فيليالىنىڭ ديرەكتورى تىلەۋحان ابىلدايەۆ حابارلادى. 2021 جىلى جوعارى تەحنولوگيالاردى پايدالانا وتىرىپ جاسالاتىن وپەراسيالار مەن مانيپۋلياسيالارعا بارلىعى 14،9 ملرد تەڭگە باعىتتالدى دەپ حابارلايدى almaty-akshamy.kz
مىندەتتى مەديسينالىق ساقتاندىرۋدىڭ ارقاسىندا الماتىلىقتارعا ەكو سياقتى قىمبات قىزمەتتەر قولجەتىمدى. ەگەر 2020 جىلى 563 ملن تەڭگە سوماعا 643 ەكو مانيپۋلياسياسى جۇرگىزىلسە، 2021 جىلى 3687 قىزمەتكە 3،5 ملرد تەڭگە باعىتتالدى. ءوسىم 5،7 ەسە.
«ءقازىر الماتى بويىنشا مەديسينالىق ساقتاندىرۋ قورىمەن كەلىسىمشارت اياسىندا 8 مەديسينالىق ۇيىم ەكستراكورپورالدىق ۇرىقتاندىرۋدى جۇزەگە اسىرۋدا»، - دەدى ت. ابىلدايەۆ.
سونداي-اق، ول 2020 جىلى جوعارى تەحنولوگيالاردى قولدانا وتىرىپ، 184 كارديوحيرۋرگيالىق وپەراسيا جاسالعانىن، ال وتكەن جىلى 5،7 ملرد تەڭگە سوماسىنا 1329 قىزمەت كورسەتىلگەنىن اتاپ ءوتتى.
بۇدان باسقا، وتكەن جىلى تمككك بويىنشا قارجىلاندىرۋ ايتارلىقتاي ارتتى – ءمامس قورىنان شامامەن 182،2 ملرد تەڭگە باعىتتالدى. ونىڭ ىشىندە جەدەل مەديسينالىق كومەك پەن سانيتارلىق اۆياسيا قىزمەتتەرىنە 9،8 ملرد تەڭگەدەن استام قارجى ءبولىندى.
العاشقى مەديسينالىق-سانيتارلىق كومەككە 36،8 ملرد تەڭگە، ستاسيونارلىق كومەككە 14،1 ملرد تەڭگە، ونكولوگيالىق ناۋقاستارعا مەديسينالىق كومەككە 16،5 ملرد تەڭگە، كونسۋلتاسيالىق-دياگنوستيكالىق كومەككە 2،4 ملرد تەڭگە، امبۋلاتوريالىق گەمودياليزگە 5،8 ملرد تەڭگە ءبولىندى.