15 اقپاندا بۇرىنعى كەڭەس وداعى ەلدەرى اۋعانستاننان اسكەرلەرىنىڭ شىعارىلعان كۇندى اتاپ وتەدى
بۇل – قازا تاپقان جاۋىنگەر-ينتەرناسيوناليستەردى ازا تۇتۋ جانە ەسكە الۋ كۇنى. الماتىلىق پوليسەيلەر اۋعان سوعىسىنا قاتىسقاندارعا باردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«جەكە قۇرامدى پاتريوتتىققا تاربيەلەۋ ماقساتىندا، كەڭەس اسكەرلەرىنىڭ اۋعانستاننان شىعارىلعان كۇنىن مەرەكەلەۋ قارساڭىندا الماتى پد بولىمشەلەرىنىڭ قىزمەتكەرلەرى ءداستۇر بويىنشا اۋعان سوعىسىنا قاتىسقاندارعا كىرىپ شىعادى. بۇل كۇندەرى قىزمەتكەرلەرىمىز اۋعان سوعىسىنا قاتىسقان ءىىو-نىڭ 25-تەن استام ارداگەرىن ارالاپ، قۇتتىقتادى. ءبىز ولاردىڭ دەندەرى ساۋ جانە امان ەكەندىكتەرىن كورگەنىمىزگە وتە قۋانىشتىمىز. ولار جاس قىزمەتكەرلەرگە سول شايقاستاردىڭ ەگجەي-تەگجەيىن ايتىپ بەرۋگە ءارقاشان دايىن. بۇل جاس پوليسيا قىزمەتكەرلەرىنىڭ رۋحى مەن وتانسۇيگىشتىگىن ارتتىرارى ءسوزسىز. ءبىز ءوز كەزەگىمىزدە ارداگەرلەرىمىزدى قولدايمىز جانە ۇمىتپايمىز»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ولجاس مىرزابەكوۆ.
اشىق اقپارات كوزدەرىنە سۇيەنسەك، اۋعان سوعىسىنا 22 296 قازاقستاندىق قاتىسقان. ونىڭ ىشىندە قايتىس بولعان 928 ادامنىڭ 119-ى - الماتىلىقتار. سونىمەن قاتار، 19-ى ءالى كۇنگە دەيىن ءىز-تۇزسىز جوعالىپ كەتكەندەردىڭ قاتارىندا. ءۇش جىل بۇرىن ەكى قازاقستاندىقتىڭ سۇيەگى تابىلىپ، ولار قازاقستانعا قايتارىلدى. الماتىدا 2 300-گە جۋىق "اۋعاندىق" جاۋىنگەر تۇرادى، ءبىر الماتىلىق "اۋعاندىق" جاۋىنگەرى ءىز-تۇزسىز جوعالعاندار تىزىمىندە. قازاقستاندا بارلىعى 15 مىڭنان استام ينتەرناسيوناليست-جاۋىنگەر تۇرادى. سوعىس 1979 جىلدىڭ 25 جەلتوقسانىنان 1989 جىلدىڭ 15 اقپانىنا دەيىن (2238 كۇن) سوزىلدى.