ەربولات دوسايەۆتىڭ تاپسىرماسى بويىنشا الماتىدا زاڭسىز قۇرىلىسقا باقىلاۋ كۇشەيتىلدى
الماتىدا قالا اكىمى ەربولات دوسايەۆتىڭ تاپسىرماسىنا سايكەس زاڭسىز قۇرىلىسقا باقىلاۋ كۇشەيتىلدى. 2022 جىلدىڭ باسىنان 2025 جىلدىڭ مامىرىنا دەيىن 90 نىسان - رۇقساتسىز سالىنعان قۇرىلىستار تولىق نەمەسە جارتىلاي ءسۇرىلدى. بۇل تۋرالى الماتى قالاسىنىڭ قالا قۇرىلىسى باقىلاۋ باسقارماسى حابارلادى.
بيىلدىڭ وزىندە 20 زاڭسىز سالىنعان قۇرىلىس بۇزىلدى. ولاردىڭ قاتارىندا تۇرعىن كەشەندەر، اكىمشىلىك عيماراتتار، جاپسارلاس سالىنعان نىساندار، ءدامحانالار، كولىك جۋۋ ورىندارى جانە باسقا دا قۇرىلىستار بار. اتاپ ايتقاندا، ءىرى نىسانداردىڭ ىشىندە «مەچتا» تاۋنحاۋسى، «KHAN» تۇك، سونداي-اق، دوستىق داڭعىلىنداعى 7 قاباتتى اكىمشىلىك عيمارات بار.
ەرەكشە نازار تاۋلى ايماقتارعا اۋدارىلىپ وتىر. بۇل جەرلەردە زاڭسىز قۇرىلىسقا قارسى شارالار كۇشەيتىلگەن. قازىرگى تاڭدا 38 نىسان بويىنشا سوت شەشىمى شىعارىلىپ، ولاردىڭ 13ء-ى تولىق نەمەسە ءىشىنارا ءسۇرىلدى. تاعى 3 نىساندا قۇرىلىس جۇمىستارى باستاپقى كەزەڭىندە توقتاتىلعان.
بارلىق جۇمىس سوت شەشىمى مەن رەسمي نۇسقامالار نەگىزىندە، سوت ورىنداۋشىلارىنىڭ قاتىسۋىمەن جۇرگىزىلۋدە. زاڭسىز قۇرىلىسقا توسقاۋىل قويۋ جۇمىستارى جالعاسىپ جاتىر.