بۇل تۋرالى الماتى اكىمى ەربولات دوسايەۆ ايتتى.
بۇگىن شاھار باسشىسى ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ اقپاراتتىق الاڭىندا الماتى اكىمى ەربولات دوسايەۆتىڭ قاتىسۋىمەن باسپا ءسوز ءماسليحاتى ءوتىپ جاتىر. وندا اكىم الماتى قالاسىنىڭ 2040 جىلعا دەيىنگى باس جوسپارى جايلى ءسوز قوزعادى، دەپ حابارلايدى Almaty-akshamy.kz.
2023 جىلعى 3 مامىردا ۇكىمەتتىڭ قاۋلىسىمەن الماتى قالاسىنىڭ 2040 جىلعا دەيىنگى باس جوسپارى بەكىتىلدى. باس جوسپار «الماتى قالاسىنىڭ 2025 جىلعا دەيىنگى دامۋ باعدارلاماسىن جانە 2030 جىلعا دەيىنگى ورتا مەرزىمدى پەرسپەكتيۆالاردى» ەسكەرە وتىرىپ، پوليسەنتريزم پرينسيپتەرىنە نەگىزدەلگەن.
«باس جوسپاردا 2040 جىلعا قاراي حالىق سانىنىڭ 3 ملن. ادامعا دەيىن كوبەيۋ بولجامىن جانە ەكونوميكانىڭ ورتاشا جىلدىق 5%-كە ءوسۋىن ەسكەرە وتىرىپ، 5 پوليسەنتر قۇرىلىمىن بىركەلكى قالىپتاستىرۋ قاراستىرىلعان. ءبىلىم بەرۋ جانە دەنساۋلىق ساقتاۋ وبەكتىلەرى قادامدىق قولجەتىمدى بولادى. 200 جاڭا مەكتەپ جانە 80-نەن استام مەديسينالىق مەكەمە سالىنادى. قوعامدىق كولىكتىڭ ۇلەسى 60%-كە دەيىن ۇلعايتىلادى (2023 ج. – 35%). 210 كم جاڭا جولدار، 3،6 مىڭ كم ينجەنەرلىك جەلى جانە اۋدانى 2 750 گا جاڭا ساياباقتار مەن سكۆەرلەر سالىنادى (2023 ج. – 1 100 گا)»، - دەدى ە.دوسايەۆ.
باس جوسپاردى ىسكە اسىرۋ الەۋمەتتىك جانە ينجەنەرلىك-كولىك ينفراقۇرىلىمىن ەسكەرە وتىرىپ، الماتى قالاسى اۋماعىنىڭ ۇيلەسىمدى دامۋىن قامتاماسىز ەتەدى.