الماتىدا جاندوسوۆ – سايىن – شالياپين كوشەلەرى مەن قارعالى وزەنى اۋماعىندا 20 شاقىرىم سۋمەن قامتۋ جەلىلەرى سالىنادى
الماتىنىڭ اۋەزوۆ اۋدانىندا 2024 جىلدىڭ ناۋرىز ايىندا «مامىر-4» شاعىن اۋدانىندا 4،5 شاقىرىم سۋمەن قامتۋ جانە 9،5 شاقىرىم سۋ بۇرۋ جەلىلەرىن سالۋ باستالادى. بۇل تۋرالى اكىم ەربولات دوسايەۆ قالا تۇرعىندارىمەن كەزدەسۋدە ايتتى. بۇل جۇمىستى 2025 جىلدىڭ ناۋرىز ايىندا اياقتاۋ جوسپارلانىپ وتىر. جاڭا ينجەنەرلىك كوممۋنيكاسيالار 197 ءۇي مەن 750 تۇرعىندى قامتيدى.
«جاندوسوۆ – سايىن – شالياپين كوشەلەرى مەن قارعالى وزەنى بولىگىندە 20 شاقىرىم سۋمەن قامتۋ جانە 22 شاقىرىم سۋ بۇرۋ جەلىلەرىن سالۋ جوسپارلانعان. قۇرىلىس-مونتاجداۋ جۇمىستارى 2024 جىلدىڭ مامىر ايىندا باستالادى. ءبىرىنشى كەزەڭدە 4،8 ملرد تەڭگە ءبولىندى»، - دەدى قالا باسشىسى.
تۇرعىنداردى ساپالى سۋمەن جانە كارىزبەن قامتاماسىز ەتۋ ماقساتىندا سايىن جانە ۇلىقبەك كوشەلەرىندەگى 4 شاقىرىم جەلى قايتا جاڭارتىلدى. سونىمەن قاتار، تولە بي كوشەسىنىڭ سايىن كوشەسىنەن مومىش ۇلى كوشەسىنە دەيىنگى ۇزىندىعى 1 شاقىرىم سۋ قۇبىرى قايتا جاڭارتىلىپ جاتىر، ول بيىل ناۋرىزدا اياقتالادى. بۇل ۋچاسكەلەردە سۋ جانە كارىز جەلىلەرى 1960-1970 جىلدارى سالىنعان. جالپى ۇزىندىعى 59،3 شاقىرىم.
بۇعان قوسا، بۇرىنعى «ۆوسحود»، «سادوۆود» جانە «ارداگەر» باۋ-باقشا سەرىكتەستىكتەرىنىڭ 8 كوشەسىندەگى 5،2 شاقىرىم ينجەنەرلىك جەلىنىڭ قۇرىلىسى اياقتالىپ كەلەدى. ءقازىر ابونەنتتەردى جەلىلەرگە قوسۋ جۇمىستارى قولعا الىنعان، ول وسى ناۋرىزدا بىتەدى.
ەربولات دوسايەۆ 2023 جىلدىڭ قىركۇيەك ايىندا «دوستىق» شاعىن اۋدانىندا جالپى سوماسى 1،1 ملرد تەڭگەگە سۋ بۇرۋ جەلىلەرىنىڭ قۇرىلىسى باستالعانىن ەسكە سالدى. ونىڭ ايتۋىنشا، بۇگىندە ۇزىندىعى 3 شاقىرىم بولاتىن روزىباكييەۆ، تەرمە، تاۋكە حان كوشەلەرىندەگى ينجەنەرلىك جەلىلەردىڭ قۇرىلىسى جارتىلاي اياقتالدى. قارجىلاندىرۋ كولەمى تاعى 1،4 ملرد تەڭگەگە ۇلعايادى (جالپى سوماسى 2،5 ملرد تەڭگە). بۇل جۇمىستار ناۋرىز ايىندا قايتا باستالىپ، 2024 جىلدىڭ سوڭىنا دەيىن جالعاسادى.
2024 جىلى «مامىر» شاعىن اۋدانىندا جانە سايىن كوشەسىنىڭ بويىنداعى جالپى ۇزىندىعى 3،2 شاقىرىم جىلۋمەن جابدىقتاۋ جەلىلەرىن قايتا جاڭارتۋ جوسپارلانعان، ونىڭ 2،3 ءشاقىرىم-ى 2023 جىلى اياقتالدى، قالعان 900 مەترىن قىركۇيەك ايىنىڭ سوڭىنا دەيىن اياقتاۋدى كوزدەپ وتىرمىز، - دەپ ءسوزىن تۇيىندەدى قالا باسشىسى.