الماتىنىڭ اۋەزوۆ اۋدانىندا 42 شاقىرىم استام ەلەكتر كابەل جەلىلەرى جاڭعىرتىلادى
2024 جىلى الماتى قالاسىنىڭ اۋەزوۆ اۋدانىندا ينۆەستيسيالىق باعدارلامالار اياسىندا 25 شاقىرىم ەلەكترمەن جابدىقتاۋ جەلىلەرىن جانە 23 ترانسفورماتورلىق جانە 1 تاراتۋ قوسالقى ستانسياسىن جاڭعىرتۋ جوسپارلانعان. بۇل تۋرالى قالا اكىمى ەربولات دوسايەۆ اۋدان تۇرعىندارىمەن كەزدەسۋدە مالىمدەدى.
«ساپالى ينجەنەرلىك ينفراقۇرىلىممەن قامتاماسىز ەتۋ ءبىز ءۇشىن نەگىزگى باعىتتاردىڭ ءبىرى. بىلتىر تۇرعىنداردى تۇراقتى ەلەكتر قۋاتىمەن قامتاماسىز ەتۋ بويىنشا جۇمىس اتقارىلدى. 30 شاقىرىم ەلەكتر بەرۋ جەلىلەرى اۋىستىرىلدى، 17 ترانسفورماتورلىق جانە 69 تاراتۋ پودستانسياسى مودەرنيزاسيالاندى»، - دەدى قالا باسشىسى.
اۋدان اكىمدەرىنىڭ وكىلەتتىكتەرىن كەڭەيتۋ ماقساتىندا جارىق جەلىلەرىنە قىزمەت كورسەتۋ جۇمىستارى اكىمدەردىڭ قۇزىرەتىنە بەرىلدى. وتكەن جىلدىڭ قاراشا ايىندا اۋەزوۆ اۋدانىنىڭ اكىمدىگى «الماتى قالا جارىق» مەكەمەسىمەن شارت جاساستى. 3 ايدىڭ ىشىندە 9،5 شاقىرىم كابەل جەلىسى اۋىستىرىلدى، 471 شام ورناتىلدى، 749 LED-شام اۋىستىرىلدى جانە 263 شام جوندەلدى.
«بيىل 42 شاقىرىمنان استام كابەل جەلىلەرى جاڭارتىلىپ، 5 مىڭنان استام جارىق شامدارىن LED-شامدارعا اۋىستىرۋدى جوسپارلاپ وتىرمىز. اۋەزوۆ اۋدانىن ساپالى جارىقپەن تولىق قامتۋ ءۇشىن وسى ناۋرىز ايىندا 81 سىرتقى جارىق جەلىسىن سالۋ ءۇشىن جوبالاۋ-سمەتالىق قۇجاتتامانى ازىرلەۋ باستالادى»، - دەدى ەربولات دوسايەۆ.