الماتىدا 565 بىرلىك تەحنيكا جانە 1069 جۇمىسشى جولدىڭ قاۋىپسىزدىگىن قامتاماسىز ەتەدى، دەپ حابارلايدى aqshamnews.kz الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسىنا سىلتەمە جاساپ.
22 قاراشا كۇنى تۇنگى ساعات 12-دەن باستاپ الماتىدا جاڭبىر تۇرىندەگى جاۋىن-شاشىن، ال تاڭعى ساعات 5-تەن باستاپ تاۋلى جانە تاۋعا جاقىن اۋدانداردا قار ارالاس جاڭبىر، ساعات 7-دەن باستاپ قالانىڭ وزىندە قار جاۋا باستادى. جاۋىن-شاشىن تاڭعى 10-عا دەيىن جالعاسادى دەپ كۇتىلۋدە. تاڭەرتەڭگى 9-داعى مالىمەت بويىنشا قالادا 4 مم جاۋىن-شاشىن، ال شىمبۇلاقتا 0،5 سم قار ءتۇستى.
كۇندىزگى ۋاقىتتا 565 بىرلىك ارنايى تەحنيكا مەن 1069 جۇمىسشىجۇمىلدىرىلدى. ارىق وتكەلدەرىنىڭ بىتەلۋىنىڭ الدىن الۋ جانە جەرگىلىكتى سۋ باسۋ ماسەلەسىن جويۋ ءۇشىن موتوپومپا، باگر جانە باسقا قۇرالدارمەن جابدىقتالعان 32 جەدەل ءموبيلدى بريگادا كەزەكشىلىك ەتەدى.
توتەنشە جاعدايلار قىزمەتىنىڭ مالىمەتىنشە، سۋ باسۋ وقيعاسى تىركەلمەگەن. كوكتايعاقتىڭ الدىن الۋ ماقساتىندا بوستاندىق جانە مەدەۋ اۋداندارىنىڭ جوعارعى بولىگىندە 120 قۇمشاشقىشتىڭ كومەگىمەن كوكتايعاققا قارسى ماتەريالدار سەبىلدى.
تاڭەرتەڭگى ساعات 9-عا دەيىن 55 توننا ماتەريال پايدالانىلدى. تاڭعى ساعات 5-تەن باستاپ 30 «ەپوكا» تەحنيكاسى ارقىلى قالانىڭ جوعارعى اۋداندارىنداعى جولدار (مەدەۋ، شىمبۇلاق، بۋتاكوۆكا، شااج، سادىقوۆ، اسقاروۆ، دۋلاتي كوشەلەرى جانە ت.ب.) سۇيىق كوكتايعاققا قارسى رەاگەنتتەرمەن وڭدەلدى. بارلىعى 85 م³ مۇزعا قارسى ەرىتىندى قولدانىلدى.
«قازگيدرومەت» رمك مالىمەتىنشە، نەگىزگى جاۋىن-شاشىن تاڭعى 10-عا دەيىن اياقتالادى. ءارى قاراي ايتارلىقتاي جاۋىن-شاشىن بولمايدى. كۇندىز اۋا تەمپەراتۋراسى +2…+4 °C بولادى.