زاڭسىز اعاش كەسكەن قۇرىلىس كومپانياسىنا قاتىستى قىلمىستىق ءىس قوزعالدى.
الماتى قالالىق ەكولوگيا جانە قورشاعان ورتا باسقارماسىنىڭ مالىمەتىنشە، «Qazaq Stroy Almaty» ج ش س 17 گەكتار جەردەگى جاسىل جەلەكتى وتاپ تاستاعان، دەپ حابارلايدى Almaty-akshamy.kz
الاتاۋ اۋدانى، دارابوز شاعىناۋدانىندا جالپى كولەمى 17 گا جەر ۋچاسكەسىندە اعاش كەسۋگە جانە قۇرىلىس جۇرگىزۋگە رۇقسات بەرىلمەسە دە مۇنداعى 176 اعاش جانە 40-تان استام جابايى وسكەن بۇتالار (بارلىعى 216 ءتۇپ) كەسىلگەن.
«وسىعان بايلانىستى باسقارما مامانداندىرىلعان تابيعات قورعاۋ پروكۋراتۋراسى جانە تابيعات قورعاۋ پوليسياسىنىڭ قىزمەتكەرلەرىمەن بىرلەسىپ كەلتىرىلگەن زالالدى ەسەپتەيدى ءارى جاسىل جەلەكتەردى تەكسەرۋ اكتىسىن جاسايدى. انىقتالعان فاكتى بويىنشا الماتى قالاسى الاتاۋ اۋدانىنىڭ پوليسيا باسقارماسى ق ر قىلمىستىق كودەكسىنىڭ 340-بابى بويىنشا قىلمىستىق ءىس قوزعادى»، - دەپ حابارلادى اكىمدىكتىڭ باسپا ءسوز قىزمەتى.
كومپانيا 2023 جىلعى ماۋسىمنان باستاپ «مەملەكەتتىك قىزمەتتەر» پورتالى ارقىلى (Elicense.kz) الماتى قالاسىنىڭ ەكولوگيا جانە قورشاعان ورتا باسقارماسىنا «Qazaq Stroy Almaty» جشس-نەن تۇرعىن ءۇي كەشەنى قۇرىلىسىنىڭ اۋماعىندا اعاشتاردى كەسۋگە رۇقسات الۋ ءۇشىن 6 رەت ءوتىنىم بەرگەن. بارلىق وتىنىمدەرگە ۇسىنىلعان ماتەريالداردا جاسىل جەلەكتەر تۋرالى اقپاراتتىڭ مازمۇنى بار ساراپتاما قورىتىندىسىنىڭ بولماۋى سەبەبىنەن اعاشتاردى كەسۋگە رۇقسات بەرىلمەدى. اعاشتاردى كەسۋگە رۇقسات بەرۋ مەملەكەتتىك قىزمەت بولىپ تابىلادى. قاجەتتى قۇجاتتار پاكەتى تولىق ۇسىنىلعان جاعدايدا رۇقسات بەرۋدەن باس تارتۋ مۇمكىن ەمەس.
«بەكىتىلگەن جانە كەلىسىلگەن قالا قۇرىلىسى قۇجاتتاماسىندا (مەملەكەتتىك ۆەدومستۆودان تىس ساراپتاما) كوزدەلگەن قۇرىلىس قىزمەتىن، قۇرىلىس-مونتاج جۇمىستارىن جۇزەگە اسىرۋ ءۇشىن جاعدايلاردى قامتاماسىز ەتۋ جونىندەگى قۇجاتتاردىڭ تولىق پاكەتىنىڭ ۇسىنىلۋىنا بايلانىستى 2023 جىلعى 11 جەلتوقساندا باسقارما جوعارىدا كورسەتىلگەن مەكەنجاي بويىنشا كەسۋگە رۇقسات بەرىلگەن 2797 دانا اعاشتىڭ ورنىنا 27 970 دانا كولەمىندە وتەمدىك جاسىل جەلەك وتىرعىزاتىن بولادى. باسقارما سونىمەن قاتار 100 دانا جاسىل جەلەكتەردى باسقا جەرگە وتىرعىزۋ جونىندەگى جۇمىستارعا كەلىسىم بەردى»، - دەلىنگەن حابارلامادا.
كوشەتتەردى وتىرعىزۋ «الماتى قالاسىنىڭ جاسىل جەلەكتەرىن كۇتىپ-ۇستاۋ جانە قورعاۋ قاعيدالارىنىڭ» بارلىق تالاپتارىن ساقتاي وتىرىپ، بيىكتىگى كەمىندە 2،5 مەتر بولاتىن جالپى پايدالانىمداعى جەرلەردە جۇرگىزىلەدى.