وسىعان دەيىن ەلىمىزدە باسسەيندىك ينسپەكسيا قىزمەتكەرلەرىنىڭ سانى 98 ادام بولسا، ءقازىر جالپى شتات سانى 242 ادامعا جەتتى.
بۇل رەسپۋبليكانىڭ ءاربىر وبلىس ورتالىعىندا باسسەيندىك ينسپەكسيا بولىمدەرىن اشۋعا مۇمكىندىك بەردى. بيىل ۇلىتاۋ جانە جەتىسۋ وبلىستارى بويىنشا باسسەيندىك ينسپەكسيا بولىمدەرى، سونداي-اق اقتوبە، باتىس قازاقستان، ماڭعىستاۋ جانە تۇركىستان وبلىستارىنداعى بولىمدەر قوسىلادى، دەپ حابارلايدى Almaty-akshamy.kz سالا مينيسترلىگىنە سىلتەمە جاساپ.
بۇدان بولەك، جاڭا سۋ كودەكسىندە باسسەيندىك ينسپەكسيالارعا قاداعالاۋ فۋنكسيالارىن بەرۋ قاراستىرىلعان. ال كاسىپكەرلىك كودەكس سۋ رەسۋرستارىن باسقارۋ ورگاندارى جەدەل دەن قويۋ شارالارىن قابىلداي الاتىن نورمالارمەن تولىقتىرىلۋدا.
«قازاقستاننىڭ سۋ رەسۋرستارىن قورعاۋ ماسەلەسى كۇن تارتىبىندە تۇر. سۋدىڭ «قارا نارىعىن» جويۋ جانە ونىڭ پايدالانۋىن باقىلاۋدى قامتاماسىز ەتۋ ءۇشىن ءبىز باسسەيندىك ينسپەكسيالار شتاتىن ارتتىردىق، سونىمەن قاتار ولاردىڭ ماتەريالدىق-تەحنيكالىق بازاسىن جاقسارتۋدى جوسپارلاپ وتىرمىز. بۇل شارالار بىزگە مۇمكىندىگىنشە كوپ سۋ ايدىندارىن قامتۋعا مۇمكىندىك بەرەدى»، - دەدى ق ر سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.