الماتىدا 16 مىڭ اپاتتى اعاشتىڭ ورنىنا 160 مىڭ كوشەت وتىرعىزىلادى، دەپ حابارلايدى Almaty-akshamy.kz
_ءبىر ەسكى اعاشتىڭ ورنىنا 10 جاڭاسى وتىرعىزىلادى._
الماتىدا 84 مىڭنان استام اپاتتى اعاش بار. الماتى قالاسى ەكولوگيا جانە قورشاعان ورتا باسقارماسىنىڭ مونيتورينگ ءبولىمىنىڭ باسشىسى نۇرلان قۇتتىبايەۆتىڭ ايتۋىنشا، اعاشتاردى تىزىمدەۋ 2019 جىلى جۇرگىزىلگەن. ونىڭ قورىتىندىسى بويىنشا كەسىلۋگە ءتيىس اپاتتى اعاشتار انىقتالدى.
«بۇل جۇمىستار بىلتىر باستالدى، بۇگىندە 5 مىڭى كەسىلدى. جوسپار بويىنشا، بيىل 16 925 اپاتتى اعاش كەسىلىپ، جىل باسىنان بەرى 2،5 مىڭنان استام اعاش الىندى. ونىڭ ورنىنا 1:10 جۇيەسى بويىنشا كوشەت وتىرعىزىلادى، ياعني 160 مىڭنان استام كوشەت ەگىلەدى»، - دەدى نۇرلان قۇتتىبايەۆ.
ول ءۇشىن ماماننىڭ ايتۋىنشا، بايقاۋ جاريالانىپ، مامانداندىرىلعان ۇيىمدارمەن شارت جاسالدى.
«قازىرگى ۋاقىتتا الماتى قالاسىنىڭ اۋماعىندا اپاتتى اعاشتاردى كەسۋگە 35-تەن استام تەحنيكا – اۆتوجولدار، ءوزى اۋدارعىش جۇك كولىكتەرى، سونىمەن قاتار، 180-دەن استام ادام جۇمىلدىرىلدى. جۇمىستار جاسىل جەلەكتەردى كۇتىپ ۇستاۋ تالاپتارىن ساقتاي وتىرىپ جۇرگىزىلەدى»، - دەدى سپيكەر.
اعاشتىڭ اپاتتىلىعىن انىقتاۋعا ينستيتۋتتاردىڭ عىلىمي قىزمەتكەرلەرى، قالا تۇرعىندارى تارتىلىپ، مۇقيات تالداۋ جاسالادى. نۇرلان قۇتتىبايەۆتىڭ ايتۋىنشا، جاقىن ماڭداعى ۇيلەردىڭ تۇرعىندارى جاسىل جەلەكتەردى كەسۋدىڭ باستالعانى تۋرالى الدىن الا حابارلانادى. بۇعان دەيىن ارنايى بەلگىلەر ورناتىلىپ، اۋماقتار قورشالادى.