بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى Almaty-akshamy.kz.
ۇكىمەت باسشىسىنىڭ سوزىنشە، قولجەتىمدى ينتەرنەت» ۇلتتىق جوباسى اياسىندا 2027 جىلعا دەيىن اۋىلداردى تىركەلگەن ينتەرنەتپەن قامتۋدى 44-تەن 100 پايىزعا دەيىن ۇلعايتۋ جوسپارلانعان.
«وسىعان بايلانىستى 1،2 ملن استام ادامدى قامتي وتىرىپ، 3 183 اۋىلعا دەيىن تالشىقتى-وپتيكالىق بايلانىس جەلىلەرىن توسەۋ جانە 504 ەلدى مەكەندى سپۋتنيكتىك ينتەرنەتپەن قامتاماسىز ەتۋ جونىندەگى جوبالاردى ىسكە اسىرۋ كوزدەلىپ وتىر. سونداي-اق، رەسپۋبليكالىق جانە نەگىزگى وبلىستىق جولداردا ۇزىندىعى 17 مىڭ شاقىرىم بولاتىن 500-گە جۋىق انتەننا-دىڭگەك قۇرىلىستارىن ءموبيلدى ينتەرنەتپەن سالۋ جوسپارلاندى»، - دەدى ءاليحان سمايىلوۆ جاۋابىندا.
ۇكىمەت باسشىسىنىڭ دەرەگىنشە، «اۋىل – ەل بەسىگى» جوباسىن ىسكە اسىرۋ اياسىندا 2019 جىلدان باستاپ ينفراقۇرىلىمدى، ونىڭ ىشىندە ينجەنەرلىك (جابدىقتار، جىلۋمەن، ەلەكترمەن جابدىقتاۋ وبەكتىلەرى جانە سۋمەن، جىلۋمەن، گازبەن، ەلەكترمەن جابدىقتاۋ جەلىلەرى) جانە كولىكتىك (كەنتىشىلىك جولدار، كوشەلەردى جارىقتاندىرۋ) ينفراقۇرىلىمداردى جاڭعىرتۋ جولىمەن اۋىلدىق ەلدى مەكەندەردى جاقسارتۋ بويىنشا جۇمىس جۇرگىزىلەدى. ماسەلەن، 2019-2022 جىلدارى 3،5 مىڭ اۋىلدى دامىتۋعا 337،7 ملرد تەڭگە ءبولىنىپ، 3،6 مىڭنان استام جوبا ىسكە اسىرىلدى.
«بۇل 334 تۇرعىن ۇي-كوممۋنالدىق شارۋاشىلىعى نىساندارىن، 1 174 الەۋمەتتىك ينفراقۇرىلىم نىساندارىن جانە 2،2 مىڭنان استام كولىك ينفراقۇرىلىمى جوبالارىن جاڭعىرتۋعا مۇمكىندىك بەردى. 2023 جىلى «اۋىل – ەل بەسىگى» جوباسىن ىسكە اسىرۋعا 800 اۋىلدىق ەلدى مەكەندە 1،8 مىڭ جوبانى ىسكە اسىرۋعا 198،2 ملرد تەڭگە كوزدەلگەن. بۇل قاراجات ءبىرقاتار جوبانى، ونىڭ ىشىندە 1 203 كولىك ينفراقۇرىلىمى جوباسىن (كەنتىشىلىك جولدار) ىسكە اسىرۋعا مۇمكىندىك بەرەدى»، - دەدى ول.