اكىمدىكتە ينكليۋزيۆتى قوعامدى دامىتۋ ءۇشىن بارلىق شارالار قابىلدانۋدا.
2022 جىلدىڭ باسىنان بەرى الماتىدا تۇراتىن 10 500 مۇمكىندىگى شەكتەۋلى جان تەحنيكالىق وڭالتۋ قۇرالدارىن الدى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى دانيار الكەباي ۇلى ايتتى، دەپ حابارلايدى Almaty-akshamy.kz.
تەحنيكالىق وڭالتۋ قۇرالدارىنان باسقا الماتىدا 5200 مۇگەدەكتىگى بار ادامدارعا ىمداۋ ءتىلى ماماندارىنىڭ، جەكە كومەكشىلەردىڭ كومەگى تۇرىندە الەۋمەتتىك قىزمەتتەر كورسەتىلەدى، سونداي-اق شيپاجايلىق ەمدەلۋگە جىبەرىلدى. اكىمدىكتە ينكليۋزيۆتى قوعامدى دامىتۋ ءۇشىن بارلىق شارالار قابىلدانۋدا.
سپيكەردىڭ مالىمدەۋىنشە، قالادا 53 مىڭنان استام مۇمكىندىگى شەكتەۋلى جان تۇرادى. ونىڭ ىشىندە 18 جاسقا دەيىنگى مۇمكىندىگى شەكتەۋلى بالالار – 8151.
«جەكە وڭالتۋ باعدارلاماسىنىڭ ارقاسىندا مۇگەدەكتەر وڭالتۋعا ارنالعان تەحنيكالىق قۇرالدارمەن جانە الەۋمەتتىك قىزمەتتەرمەن تەگىن قامتاماسىز ەتىلەدى. قاجەتتى قاراجاتتى «الەۋمەتتىك قىزمەتتەر پورتالىنان» ءوتىنىم ارقىلى الۋعا بولادى، جەكەلەگەن جاعدايلاردا ءبىز مەملەكەتتىك ساتىپ الۋ ارقىلى جەكە ىرىكتەۋدى تالاپ ەتەتىن تەحنيكالىق قۇرالداردى ساتىپ الامىز»، - دەپ ءتۇسىندىردى دانيار الكەباي ۇلى.
بريفينگ بارىسىندا دانيار الكەباي ۇلى الماتى قالاسى اكىمىنىڭ تاپسىرماسى بويىنشا «ينۆاتاكسي» كولىگىنىڭ سانى 39 بىرلىكتەن 46 بىرلىككە دەيىن ۇلعايتىلعانىن ايتتى. بۇل قىزمەتتى اي سايىن 1500 ەرەسەك ادام مەن 357 مۇمكىندىگى شەكتەۋلى بالا پايدالانادى.
الماتىدا قالا باسشىسىنىڭ باستاماسىمەن «ينۆاتاكسي» سانى ارتادى. ينۆاتاكسي اۆتوكولىكتەرىن 46-دان 100-گە دەيىن ۇلعايتۋ ءۇشىن جەرگىلىكتى بيۋدجەتتەن قوسىمشا قارجى (244 ملن.تەڭگە مولشەرىندە) ءبولىندى.
قورىتىندىلاي كەلە، ۆەدومستۆو وكىلى الماتىدا مۇگەدەكتىگى بار ادامدار ءۇشىن قولجەتىمدى ورتانىڭ قالاي قۇراتىنىن ايتىپ بەردى. قالادا 2021-2023 جىلدارعا ارنالعان نىساندارعا قولجەتىمدىلىكتىڭ كەشەندى جوسپارى جۇزەگە اسىرىلىپ جاتقانىن ەسكە سالدى. وسى كەشەندى جوسپارعا سايكەس، بۇل باعىتتاعى جۇمىستار كۇشەيتىلدى.