بيىل بارلىعى 28 مىڭ ادامدى قامتۋ جوسپارلانىپ وتىر.
بۇل تۋرالى بۇگىن وڭىرلىك كوممۋنيكاسيالار قىزمەتىندە وتكەن بريفينگتە ءبىرىنشى جارتىجىلدىقتىڭ كورسەتكىشتەرى تۋرالى الماتى قالالىق جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى دانيار الكەباي ۇلى باياندادى، دەپ حابارلايدى Almaty-akshamy.kz.
جالپى، جىل باسىنان بەرى مەگاپوليستىڭ 50 مىڭنان استام تۇرعىنىنا الەۋمەتتىك تولەمدەر بەرىلدى.
«اتاۋلى الەۋمەتتىك كومەك 4،2 مىڭنان استام وتباسىعا، ياعني 20 261 ادامعا 922 ملن.تەڭگە كولەمىندە كورسەتىلدى. بيىل بارلىعى 28 مىڭ ادامدى قامتۋ جوسپارلانىپ وتىر. ومىردە قيىن جاعدايعا تاپ بولعان ازاماتتارعا تەك ماتەريالدىق كومەك پەن قولداۋ عانا كورسەتىپ قويماي، مەيىرىمدىلىك پەن قامقورلىق تانىتۋعا تىرىسامىز»، - دەپ مالىمدەدى دانيار الكەباي ۇلى.
سونىمەن قاتار، ەڭبەككە جارامدى ااك الۋشىلار جۇمىسپەن قامتۋ ورتالىعىنا جىبەرىلەدى، ورتالىقتا ولارعا جۇمىسقا ورنالاسۋعا كومەك كورسەتىلەدى.
الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى وتباسى مۇشەلەرىنە شاققانداعى تابىسى ەڭ تومەنگى كۇنكورىس دەڭگەيىنىڭ 70 پايىزىنان اسپايتىن جاعدايدا وتباسىلارعا ااك تولەنەتىنىن اتاپ ءوتتى. ااك-تىڭ نەگىزگى الۋشىلارى – كوپ بالالى وتباسىلار، جالاقىسى تومەن جۇمىس ىستەيتىن ازاماتتار، زەينەتكەرلەر مەن مۇگەدەكتىگى بار ادامداردىڭ كۇتىمىن جاساپ وتىرعان وتباسىلار جانە باسقا دا از قامتىلعان ادامدار.
ااك تولەمدەردەن باسقا، 1 جاستان 6 جاسقا دەيىنگى بالالار تاربيەلەنەتىن وتباسىلارعا كەپىلدەندىرىلگەن الەۋمەتتىك پاكەت تە قاراستىرىلعان. جىل باسىنان بەرى 996 بالا كەپىلدەندىرىلگەن كومەكتىڭ وسى تۇرىمەن قامتىلدى، ال ولاردىڭ وتباسىلارىنا 2 853 ازىق-تۇلىك قورجىنى بەرىلدى.
الماتى قالاسى اكىمدىگى تاراپىنان كورسەتىلەتىن قولداۋدىڭ ءتىزىمى تۇرعىن ءۇي كومەگىمەن تولىقتى. كوممۋنالدىق شىعىندارى وتباسىنىڭ جالپى تابىسىنىڭ 5 پايىزىنان اساتىن از قامتىلعان وتباسىلار بيۋدجەت ەسەبىنەن وتەلەدى. بارلىعى 1،2 مىڭنان استام الماتىلىق وتباسىنا تۇرعىن ءۇي كومەگى كورسەتىلدى.
سپيكەر الەۋمەتتىك تولەمدەردىڭ باسقا تۇرلەرىمەن 14،7 مىڭ قالا تۇرعىنى قامتىلعانىن، سونداي-اق 14،3 مىڭ سوعىس ارداگەرى مەن ولارعا تەڭەستىرىلگەن ارداگەرلەر دە نازاردان تىس قالمايتىنىن حابارلادى.