قىركۇيەك ايىنا دەيىن الماتى اگلومەراسياسىن دامىتۋدىڭ كەشەندى جوسپارى ازىرلەنگەن.
الماتى قالاسىنىڭ اكىمدىگى مەملەكەت باسشىسىنىڭ تاپسىرمالارىن بەلسەندى ىسكە اسىرۋدا. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ەربولات دوسايەۆ ايتتى، دەپ حابارلايدى Almaty-akshamy.kz.
ونىڭ ايتۋىنشا، قالا ەكونوميكاسىنىڭ تۇراقتى ءوسۋى قامتاماسىز ەتىلدى. اعىمداعى جىلدىڭ 5 ايىنىڭ قورىتىندىسى بويىنشا قىسقا مەرزىمدى ەكونوميكالىق ينديكاتور 107،6%-كە دەيىن ءوستى.
«وسى جىلدىڭ باسىنان بەرى 16،3 مىڭ جۇمىس ورنى قۇرىلدى. 3،3 مىڭ ورىندىق 54 بالاباقشا اشىلدى، 45 شاقىرىم ينجەنەرلىك جەلى سالىندى. گازبەن جۇرەتىن 300 اۆتوبۋس ساتىپ الىندى، 145 مىڭ اعاش وتىرعىزىلدى»، - دەدى ول.
سونىمەن قاتار، اكىم قىركۇيەك ايىنا دەيىن الماتى اگلومەراسياسىن دامىتۋدىڭ كەشەندى جوسپارى ازىرلەنگەنىن جەتكىزدى. بۇل جوسپاردا مەگاپوليس پەن الماتى وبلىسى سينەرگياسىنىڭ جوبالارى ايقىندالاتىن بولادى.
«جوعارى ينۆەستيسيالىق بەلسەندىلىك بايقالادى، جىل باسىنان بەرى نەگىزگى كاپيتالعا سالىناتىن ينۆەستيسيالار 20،9%-كە ءوستى. قالا ەكونوميكاسىنىڭ نەگىزگى سالاسى – ساۋدا جىل باسىنان بەرى العاش رەت 1،7%-كە ءوسىپ، «وڭ ايماققا» شىقتى. وسى جىلدىڭ 5 ايىندا الماتىداعى ىسكەرلىك بەلسەندىلىك يندەكسى 4 پروسەنتتىك تارماققا ءوسىپ، مامىر ايىنىڭ سوڭىندا 48،7%ء-تى قۇرادى. ءبىرىنشى جارتى جىلدىقتىڭ قورىتىندىسى بويىنشا 50%-تەن استام دەڭگەيمەن وڭ ايماققا شىعۋ كۇتىلەدى»،- دەدى قالا اكىمى.