الماتىداعى №7 قالالىق كلينيكالىق اۋرۋحانانىڭ دارىگەرلەرى 101 جاستاعى ناۋقاسقا جامباس سۇيەگىنە كۇردەلى وتا جاساپ، ونى ءساتتى اياقتادى. بۇل تۋرالى Aqshamnews.kz حابارلايدى.
قاريا جامباس سۇيەگىنىڭ تىرەگى سىنۋىمەن اۋرۋحاناعا شۇعىل جەتكىزىلگەن. وتا جاسار الدىندا انەستەزيولوگ، كارديولوگ، تەراپيەۆت جانە تراۆماتولوگتاردان قۇرالعان كونسيليۋم پاسيەنتتىڭ جاعدايىن جان-جاقتى باعالاپ، سۇيەكتى جابىق تاسىلمەن ورنىنا سالىپ، زاماناۋي يمپلانت ورناتۋعا شەشىم قابىلداعان.
«قارت انامىز بيىل ماۋسىمدا 102 جاسقا تولادى. ونىڭ اعزاسى جاسى ۇلكەن بولعانىنا قاراماستان جاقسى جاعدايدا، سوزىلمالى دەرتى دە جوق. وتا ءساتتى ءوتتى، ەندى ول نەمەرە-شوبەرەلەرىنىڭ قاسىنا ۇيىنە ورالادى»، – دەدى اۋرۋحانانىڭ تراۆماتولوگيا ءبولىمىنىڭ مەڭگەرۋشىسى رامازان اسكەروۆ.
قازىرگى تاڭدا اجە ۇيىنە شىعارىلىپ، وڭالتۋ كەزەڭىن وتباسىمەن بىرگە جالعاستىرۋدا.