جاقىندا الماتى قالاسىنىڭ مەدەۋ اۋدانىنا قاراستى مەكتەپتەردىڭ 10–11 سىنىپ وقۋشىلارى ق ر ەنەرگەتيكا مينيسترلىگىنە قاراستى يادرولىق فيزيكا ينستيتۋتىندا (يافي) بولدى. بۇل ەكسكۋرسيا يافي مەن №7 جالپى ءبىلىم بەرەتىن مەكتەپ جانە مەدەۋ اۋداندىق ءبىلىم ءبولىمىنىڭ اراسىنداعى ءوزارا ىنتىماقتاستىق تۋرالى مەموراندۋم اياسىندا ۇيىمداستىرىلدى.
ينستيتۋتتىڭ عالىمدارى مەن ماماندارى بالالارعا بەيبىت اتوم قالاي جۇمىس ىستەيتىنىن، اتوم رەاكتورىنىڭ قۇرىلىمىن جانە يادرولىق ەنەرگيانىڭ قاۋىپسىزدىگى تۋرالى ءتۇسىندىرىپ بەردى.
يافي-دەگى ەكسكۋرسيا بارىسىندا وقۋشىلار وسى جانە باسقا دا كوپتەگەن سۇراقتارىنا جاۋاپ الدى.
«بۇل مەنىڭ ەڭ ەرەكشە ەكسكۋرسيام بولدى! بىزگە يادرولىق رەاكتوردىڭ قالاي جۇمىس ىستەيتىنىن، ينستيتۋتتا قانداي عىلىمي تاجىريبەلەر جۇرگىزىلەتىنىن جانە بەيبىت اتومنىڭ ءمانىن كورسەتتى. وتە قىزىقتى ءارى تانىمدى بولدى. ءبىز تەك جاڭا اقپارات الىپ قويماي، عىلىمي قىزمەتتىڭ اتموسفەراسىن سەزىندىك. يافي بازاسىندا وندىرىلەتىن بىرەگەي ونىمدەردى دە كوردىك»، – دەپ ءوز اسەرىمەن ءبولىستى №48 مەكتەپ-ليسەيىنىڭ 10ۆ سىنىپ وقۋشىسى كيريلل كاراسيۋك.
جاس قوناقتار بىرەگەي زەرتتەۋ رەاكتورى – ۆۆر-ك مەن يلۋ-10 ۇدەتكىش كەشەنىن كوردى. سونداي-اق، اتوم ەنەرگياسىنىڭ بەيبىت ماقساتتا قالاي قولدانىلاتىنىن ءبىلدى جانە العاش رەت عالىمدارمەن تىكەلەي جۇزدەستى.
وقۋشىلاردى رەاكتورلاردىڭ قاۋىپسىزدىگى، اتوم سالاسىنىڭ دامۋى جانە قازاقستاندا اەس سالۋ پەرسپەكتيۆاسى ەرەكشە قىزىقتىردى.
«ەكسكۋرسيا وقۋشىلارعا وتە ۇنادى، ولار كوپتەگەن سۇراقتار قويىپ، بەلسەندى قىزىعۋشىلىق تانىتتى، كورگەن-بىلگەندەرىن ءوزارا تالقىلادى، – دەدى №7 جالپى ءبىلىم بەرەتىن مەكتەپتىڭ ديرەكتورى جانار ورازالييەۆا. – «ءبىرتۇتاس تاربيە» باعدارلاماسى اياسىنداعى وسىنداي ءىس-شارالار بالالاردىڭ دۇنيەتانىمىن كەڭەيتۋدە ۇلكەن ءرول اتقارادى. سەبەبى ولار ءار بالانىڭ شىعارماشىلىق جانە ينتەللەكتۋالدىق الەۋەتىن جەكە ەرەكشەلىكتەرىنە ساي تولىق اشۋعا باعىتتالعان».