قازاقستاندا بۇگىندە 100 جاستاعى جانە ودان اسقان 448 ازامات تىركەلگەن.
ولاردىڭ ەڭ كوبى — ەلىمىزدىڭ ەڭ ءىرى مەگاپوليسى الماتى قالاسىندا تۇرادى. مۇندا 100 جانە ودان جوعارى جاستاعى 58 ادام بار، - دەپ حابارلايدى Aqshamnews.kz.
ۇزاق ءومىر سۇرەتىندەردىڭ سانى بويىنشا ەكىنشى ورىندا — تۇركىستان وبلىسى (53 ادام)، ال ءۇشىنشى ورىندا — الماتى وبلىسى (37 ادام) تۇر.
ەڭ جاسى ۇلكەن قازاقستاندىق — ۇلىتاۋ وبلىسىنىڭ تۇرعىنى، ول جۋىردا 115 جاسقا تولعان تۋعان كۇنىن اتاپ ءوتتى.
ۇزاق ءومىر سۇرۋشىلەر ۇشتىگىنە سونداي-اق پاۆلودار وبلىسىندا تۇراتىن 113 جاستاعى، جانە جامبىل وبلىسىنداعى 110 جاستاعى ازاماتتار كىرەدى.
ەسكە سالا كەتەيىك، جىل سايىن 1 قازاندا قازاقستاندا جانە الەمنىڭ كوپتەگەن ەلدەرىندە حالىقارالىق قارتتار كۇنى اتاپ وتىلەدى. بۇل كۇن بىرىككەن ۇلتتار ۇيىمىنىڭ باس اسسامبلەياسى 1990 جىلى 14 جەلتوقساندا جاريالاعان.
مەرەكەنىڭ ماقساتى – ەگدە جاستاعى ادامداردىڭ مەملەكەت پەن قوعام دامۋىنا قوسقان ۇلەسىن قۇرمەتتەۋ، ولاردىڭ ماسەلەلەرى مەن قاجەتتىلىكتەرىنە نازار اۋدارۋ، ءومىر ءسۇرۋ ساپاسىن جاقسارتۋ جانە قارتتارعا جان-جاقتى قامقورلىق كورسەتۋ.