عاسىر جاساعان الماتىلىق اجەيگە جاڭا جەكە كۋالىك بەرىلدى
الماتى پوليسياسى 100 جاستاعى قازاق كسر-ىنىڭ ەڭبەك سىڭىرگەن ونەر قايراتكەرىنە جاڭا جەكە كۋالىگىن تاپسىردى، دەپ حابارلايدى Almaty-akshamy.kz Polisia.kz-كە. سىلتەمە جاساپ.
كوشى-قون قىزمەتكەرلەرى جاڭا قۇجاتتى ماريا احمەتوۆانىڭ ۇيىنە اپارىپ بەرگەن.
«ءسىزدى 100 جاسقا تولۋىڭىزعا بايلانىستى بەرىلگەن جاڭا كۋالىكپەن قۇتتىقتاعىم كەلەدى. سىزگە ۇزاق ءومىر، دەنساۋلىق، باقىت جانە اماندىق تىلەيمىن»، – دەدى كوشى-قون قىزمەتى باسقارماسىنىڭ ءبولىم باستىعى جاننا جاقىپبايەۆا.
ءوز كەزەگىندە عاسىر جاساعان قارت اجەي پوليسيا قىزمەتكەرلەرىنە العىس ايتتى.
«مەن ىشكى ىستەر ورگاندارىنىڭ جۇمىسىنا وتە ريزامىن. پوليسيا قىزمەتكەرلەرىنە ريزاشىلىعىمدى بىلدىرەمىن»، – دەيدى ماريا اجەي.
ماريا احمەتوۆا 1921 جىلى 13 ناۋرىز كۇنى جامبىل وبلىسى شۋ اۋدانىندا دۇنيەگە كەلدى. قازاق كسر-ىنىڭ ەڭبەك سىڭىرگەن ونەر قايراتكەرى. ش.ءۋاليحانوۆ اتىنداعى مەملەكەتتىك سىيلىقتىڭ لاۋرەاتى. 1957 جىلى ماسكەۋدە ونەرتانۋ عىلىمدارىنىڭ كانديداتتىق ديسسەرتاسياسىن قورعاعان ءبىرىنشى قازاق ايەلى.