قالادا جىلىتۋ ماۋسىمى قالىپتى جاعدايدا ءوتىپ جاتىر. الەۋمەتتىك نىساندارعا 8 قازاندا، تۇرعىن ۇيلەرگە جىلۋ 10 قازاننان باستاپ بەرىلەتىن بولدى.
وڭىرلىك كوممۋنيكاسيالار قىزمەتىندە ەنەرگەتيكا جانە سۋمەن جابدىقتاۋ باسقارماسىنىڭ باسشىسى نۇرباقىت سەرىكباي وسىلاي دەپ مالىمدەدى.
باسقارما باسشىسىنىڭ ايتۋىنشا، الماتىدا بيىلعى كۇزگى جانە قىسقى كەزەڭگە دايارلىق بارىسىندا ينجەنەرلىك جەلىلەردى جاڭارتۋ باستى نازاردا بولدى. بيىل 39 شاقىرىم جىلۋ جەلىسى قايتا جاڭعىرتىلدى. بۇل جەلىلەردىڭ توزۋ دەڭگەيىن 1،8%-عا تومەندەتۋگە مۇمكىندىك بەرگەن.
«جىل سايىن جىلۋ جەلىلەرىنىڭ توزۋ دەڭگەيىن 1،8–2%-عا تومەندەتۋدى جوسپارلاپ وتىرمىز»، - دەدى نۇرباقىت سەرىكباي.
ءقازىر قالانىڭ بارلىق اپاتتىق قىزمەتتەرى كۇشەيتىلگەن جۇمىس رەجيمىندە ىستەپ جاتىر. 100-دەن استام اپاتتىق بريگادا مەن 400-گە جۋىق مامان جۇمىلدىرىلعان. مازۋت پەن كومىر قورى دا جەتكىلىكتى.
سپيكەردىڭ ايتۋىنشا، تۇرعىنداردىڭ ءالى دە جىلۋ جەلىلەرىنە بەرەشەگى بار. ارالىق كەزەڭدە بۇل ماسەلە جەكە سوت ورىنداۋشىلارى ارقىلى شەشىلىپ جاتىر. ول جىلۋ اقىسىن ۋاقىتىلى تولەۋ ينجەنەرلىك جەلىلەردى جاڭارتىپ، ينۆەستيسيالىق باعدارلامالاردى ىسكە اسىرۋعا مۇمكىندىك بەرەتىنىن اتاپ ءوتتى.
ەسكە سالايىق، الماتىدا جىلىتۋ ماۋسىمى قالا اكىمىنىڭ قاۋلىسىنا سايكەس 8 قازاندا باستالدى. ءبىرىنشى كەزەكتە بالاباقشا، مەكتەپ پەن مەديسينالىق مەكەمەلەر سياقتى الەۋمەتتىك نىساندارعا جىلۋ بەرىلدى.