الماتىدا جىلۋ شارۋاشىلىعىن جاڭعىرتۋدىڭ ەڭ ۇلكەن كەزەڭى اياقتالىپ قالدى. «الماتى قالاسىن دامىتۋ جول كارتاسى» اياسىندا «الماتىتەپلوكوممۋنەنەرگو» ءجشس-نىڭ 17 قازاندىعى جوندەلدى. بۇل — قالاداعى بارلىق نىسانداردىڭ شامامەن 20%-ى. ەنەرگەتيكا جانە سۋمەن جابدىقتاۋ باسقارماسىنىڭ باسشىسى نۇرباقىت سەرىكباي وڭىرلىك كوممۋنيكاسيالار قىزمەتىنىڭ بريفينگىندە وسىلاي دەپ حابارلادى.
جوندەۋ جۇمىستارى تۇركسىب، مەدەۋ، الاتاۋ مەن جەتىسۋ اۋداندارىندا جۇرگىزىلدى. جوبالار اياسىندا ەسكىرگەن جابدىقتار اۋىستىرىلىپ، باسقارۋ جۇيەلەرى جاڭارتىلدى، جاڭا دەاەراتورلار، سورعىلار مەن اككۋمۋلياتورلىق باكتار ورناتىلدى، سونداي-اق وسى زامانعى قازاندىق عيماراتتارى سالىندى.
«كاسىپورىن قازاندىقتاردى جوندەۋ، جاڭارتۋ مەن قايتا قۇرۋ بويىنشا كوپ جۇمىس ىستەدى. باستى ماقساتىمىز — قالا تۇرعىندارىن سەنىمدى، ءقاۋىپسىز جانە ءتيىمدى جىلۋمەن قامتاماسىز ەتۋ»، — دەيدى باسقارما باسشىسى.
2026 جىلى جول كارتاسى اياسىندا تاعى 20 قازاندىقتى جاڭارتۋ جوسپارلانىپ وتىر. 2030 جىلعا دەيىن 61 نىسان جاڭعىرتىلماق. بۇل قالاداعى جىلۋ جۇيەسىنىڭ قۋاتتى ۇنەمدەپ، سەنىمدى ءارى تازا بولۋىن قامتاماسىز ەتپەك.