الماتىدا تۇرعىنداردىڭ جايلىلىعى ءۇشىن اۋلا اۋماقتارىن كۇردەلى جوندەۋ جالعاسۋدا، دەپ حابارلايدى almaty-akshamy.kz
الماتى اكىمى ەربولات دوسايەۆ جۇمىس ساپارى جانە حالىقپەن كەزدەسۋ بارىسىندا اۋەزوۆ اۋدانىنداعى، جاندوسوۆ كوشەسى، 59/1، 59ب، 59ۆ كوشەسىندەگى 10 شاعىن اۋدانداعى اۋلا اۋماعىن كۇردەلى جوندەۋمەن تانىستى.
اۋەزوۆ اۋدانىنىڭ اكىمى ابزال ەگەمبەردييەۆ قالا باسشىسىنا قۇرىلىس - مونتاج جۇمىستارى ماۋسىم ايىندا باستالىپ، بيىل قازان ايىندا اياقتالادى دەپ ەسەپ بەردى. ونىڭ ايتۋىنشا، كۇردەلى جوندەۋ «الماتىباسجوسپار» عزي اۋلا اۋماقتارىن اباتتاندىرۋ بويىنشا بەكىتكەن ادىستەمەلىك قۇرال نەگىزىندە جۇرگىزىلەدى.
اۋلالاردى ارالاۋ بارىسىندا ەربولات دوسايەۆ سپورتتىق جانە بالالار ويىن الاڭدارىن جاڭعىرتۋدى، سپورت الاڭىن جاڭارتۋدى، ورىندىقتارمەن دەمالىس ايماقتارىن جابدىقتاۋدى تاپسىردى. الماتى اكىمى قاۋىپسىزدىك پەن جايلىلىق سياقتى ولشەمدەرگە ەرەكشە نازار اۋدارۋ قاجەت ەكەنىن اتاپ ءوتتى. سونداي-اق، اكىم بارلىق اۋلا نىساندارىن ءبىرىڭعاي كەشەنگە بىرىكتىرۋ كەرەكتىگىن ايتتى.
اۋلا تۇرعىندارى ەربولات دوسايەۆقا اۋماقتى اباتتاندىرعانى ءۇشىن العىس ايتىپ، اكىمنەن ورتا جاستاعى ادامدارعا ارنالعان ترەناجەرلەر ورناتۋدى سۇرادى. ەربولات دوسايەۆ اۋدان باسشىلىعىنا جەرگىلىكتى تۇرعىنداردىڭ ءوتىنىشىن ورىنداۋدى تاپسىردى.
ايتا كەتەرلىگى، 10 شاعىن اۋدانداعى 59/1، 59ب، 59ۆ ۇيلەر 1967 جانە 1969 جىلدارى سالىنىپ، پايدالانۋعا بەرىلگەن. سوڭعى رەت مۇندا جوندەۋ جۇمىستارى 14 جىل بۇرىن – 2010 جىلى جۇرگىزىلدى.
حالىقتىڭ تىعىزدىعى جانە كوپقاباتتى تۇرعىن ۇيلەردىڭ كوپتىگى بايقالاتىن اۋەزوۆ اۋدانىندا اۋلالاردى اباتتاندىرۋ جانە جاڭعىرتۋ ءبىرىنشى كەزەكتەگى ماسەلەلەردىڭ ءبىرى بولىپ تابىلادى. وتكەن جىلى اۋداندا ەربولات دوسايەۆتىڭ تاپسىرماسى بويىنشا 150-دەن استام اۋلاعا جوندەۋ جۇرگىزىلدى، اعىمداعى جىلى 23 اۋلاعا كۇردەلى جوندەۋ جۇرگىزۋ جوسپارلانۋدا. بۇل ماقساتتارعا 1،6 ملرد تەڭگە ءبولىندى.