بيىلعى وقۋ جىلىندا الماتىدا ءبىرىنشى سىنىپقا 32 مىڭعا جۋىق بالا باردى. قالا مەكتەپتەرىندە بارلىعى 317 مىڭ وقۋشى ءبىلىم الاتىن بولادى. اعىمداعى جىلى باستاۋىش سىنىپ وقۋشىلارى تەگىن ىستىق تاماقپەن قامتاماسىز ەتىلەدى، دەپ حابارلايدى اlmaty-akshamy.kz.
ءبىلىم كۇنى بىردەن سەگىز جاڭا مەكتەپ ەسىگىن ايقارا اشتى، ولاردىڭ تورتەۋى – مەملەكەتتىك. بۇل وقۋ ورىندارى "مادەنيەت"، "قالقامان"، "سايالى"، "توميريس" شاعىناۋداندارىندا ورنالاسقان جانە 6600 ورىنعا ەسەپتەلگەن. قالعان ءتورت مەكتەپ (1470 ورىن) جەكە ينۆەستيسيا ەسەبىنەن سالىندى. سونداي-اق، بۇگىندە №191، 146، 125 مەكتەپتەرگە جاپسارلاس قۇرىلىس جۇمىستارى اياقتالدى، بۇل وقۋشىلار سانىن 875 ورىنعا ۇلعايتۋعا مۇمكىندىك بەردى.
بيىلعى وقۋ جىلىنان باستاپ الماتى مەكتەپتەرى تولىعىمەن ءبىر نەمەسە ەكى اۋىسىممەن ءبىلىم الۋعا تولىق كوشەدى. "مادەنيەت" شاعىناۋدانىندا اشىلعان 1500 ورىندى مەكتەپ قالاداعى جالعىز ءۇش اۋىسىمدى مەكتەپ ماسەلەسىن شەشۋگە مۇمكىندىك بەردى. قالادا بارلىعى 210 مەملەكەتتىك جانە 91 جەكە مەنشىك مەكتەپ جۇمىس ىستەيدى. جىل سوڭىنا دەيىن بەس مەملەكەتتىك جانە ەكى جەكە مەنشىك مەكتەپتى پايدالانۋعا بەرۋ، سونداي-اق جۇمىس ىستەپ تۇرعان وقۋ ورىندارىنىڭ جانىنداعى ءۇش قوسالقى نىساننىڭ قۇرىلىسىن اياقتاۋ جوسپارلانۋدا.
بيىل از قامتىلعان وتباسىلاردان شىققان بالالاردى مەكتەپكە دايىنداۋ اياسىندا جەرگىلىكتى بيۋدجەتتەن 847 ملن تەڭگە ءبولىندى. ناتيجەسىندە الماتىنىڭ 20 مىڭعا جۋىق وقۋشىسى مەكتەپ فورماسى مەن كەڭسە كەرەك-جاراقتارىن ساتىپ الۋ ءۇشىن «جاپپاي وقىتۋ» قورىنان 43 مىڭ تەڭگە سوماسىندا قارجى الدى. دەمەۋشىلەردىڭ ارقاسىندا «مەكتەپكە جول شەكاراسىز جاقسىلىق» رەسپۋبليكالىق اكسياسى اياسىندا مۇقتاج وتباسىلاردان شىققان 4108 بالاعا جالپى سوماسى 70،6 ملن تەڭگەگە كومەك كورسەتىلدى.