بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ەكولوگيا جانە قورشاعان ورتا باسقارماسى باسشىسىنىڭ ورىنباسارى ۇلان ابدۋلدايەۆ مالىمدەدى. اكسيا باستالعاننان بەرى 643 مىڭ جاس اعاش كوشەتتەرى وتىرعىزىلدى، دەپ حابارلايدى اlmaty-akshamy.kz.
ۇلان ابدۋلدايەۆتىڭ ايتۋىنشا، قالادا 4 ميلليوننان استام اعاش وسەدى.
«الايدا، الماتىنىڭ بارلىق اۋداندارى جاسىل جانە اباتتاندىرۋ الاڭدارىمەن ماقتانا المايدى. بۇگىنگى كۇنى جاسىل جەلەكتەرمەن قامتاماسىز ەتۋ بىركەلكى ەمەس. مىسالى، الاتاۋ مەن ناۋرىزباي اۋداندارىندا جەتكىلىكسىز»، – دەدى ۇلان ابدۋلدايەۆ.
اعاشتاردىڭ جالپى سانىنان 485 مىڭ جەتىلگەن جانە جاسامىس اعاشتار نەگىزىنەن قالانىڭ ورتالىق بولىگىندە وسەدى. سونىمەن قاتار، الماتىدا 84 مىڭ اپاتتى اعاش بار.
بۇل ماسەلەنى شەشۋ ءۇشىن ولاردى كەزەڭ-كەزەڭىمەن كەسۋ جانە جاس كوشەتتەرگە اۋىستىرۋ بويىنشا ارنايى بەس جىلدىق باعدارلاما قابىلداندى. بيىل 5 مىڭ اپاتتى اعاش كەسىلىپ، ونىڭ ورنىنا 50 مىڭ كوشەت وتىرعىزىلادى.
«1 ملن اعاش وتىرعىزۋ بويىنشا «جاسىل الماتى» باعدارلاماسىن جۇزەگە اسىرۋ جالعاسۋدا. اكسيا باستالعالى 643 مىڭ كوشەت وتىرعىزىلسا، 2022 جىلدىڭ كوكتەمىندە 145 مىڭ اعاش وتىرعىزىلدى. بيىلعى جىلدىڭ سوڭىنا دەيىن 360 مىڭ جەر تەلىمى قالدى. كوگالداندىرۋ الاڭدارى عالىمداردىڭ پىكىرلەرىن ەسكەرە وتىرىپ، دەندرولوگيالىق جوسپارعا سايكەس بەلگىلەنەدى»، - دەپ اتاپ ءوتتى ۆەدومستۆو وكىلى.
وكق بارىسىندا سپيكەر جالپى پايدالانىلاتىن جەرلەردە وسەتىن بارلىق اعاشتار قالانىڭ جاسىل ەكپەلەرىنىڭ ءبىرىڭعاي تىزىلىمىنە ەنگىزىلگەنىن ەسكە سالدى. قالالىق جاسىل كەڭىستىك ءتىزىمى جۇيەسى نەگىزىندە جاسىل كەڭىستىكتەردىڭ تۇرلەرى، ءتۇر قۇرامى، اۋماق كولەمى، جاعدايى جانە ورنالاسۋى تۋرالى دەرەكتەردى ۇنەمى جاڭارتىپ وتىرادى.
باسقارما باسشىسىنىڭ ورىنباسارى تۇيتكىلدى تاقىرىپتى ايتتى – سوڭعى جىلدارى الماتىدا قالالىق ەكپەلەرگە زيان كەلتىرەتىن ينۆازيالىق زيانكەستەر تۇرلەرىنىڭ جاپپاي ەنۋى بايقالۋدا.
«ءبىز اعاشتار مەن بۇتالاردى قورعاۋ جانە جاقسارتۋ شارالارىن قابىلدادىق. ءبىز بيولوگيالىق ونىمدەر كەشەنىن جانە فەرومون تۇزاقتارىنىڭ بيولوگيالىق اگەنتتەرىن قولدانامىز»، — دەپ اتاپ ءوتتى ۇلان ابدۋلدايەۆ.
جۇرگىزىلگەن جۇمىستاردىڭ ارقاسىندا ءتاجدىڭ زاقىمدانۋ دارەجەسى 70-85%-دان 30-35%-عا دەيىن تومەندەدى، كەي جەرلەردە اۋرۋدىڭ تولىق الدىن العان.