الماتى زووباعىندا زەبرا قۇلىندادى

چاپمان زەبرالارى افريكانىڭ وڭتۇستىگىندە كەزدەسەدى

الماتى زووباعىندا زەبرا قۇلىندادى، دەپ حابارلادى Almaty-akshamy.kz قازاقپاراتقا سىلتەمە جاساپ.

14 قىركۇيەك كۇنى چاپمان زەبراسى جۇبىندا ءتورتىنشى الا قۇلىن ومىرگە كەلدى.

اتالىق زەبرا – ريچارد 21 جاستا. ول الماتى زووباعىنا ءبىر جاسىندا بوينيسادان اكەلىندى. ونىڭ جۇبى – چاپا كوپەنگاگەننەن. ءقازىر ول13 جاستا.

چاپمان زەبرالارى افريكانىڭ وڭتۇستىگىندە كەزدەسەدى – انگولا، بوتسۆانا، زيمبابۆە، ناميبيا جانە وڭتۇستىك افريكا رەسپۋبليكاسىندا. بۇل جانۋار قورعاۋ مەن قامقورلىقتى قاجەت ەتەتىن بولعاندىقتان قىزىل كىتاپقا ەنگەن.

انالىق زەبرانىڭ جۇكتىلىگى 370-390 كۇنگە سوزىلادى. كوبىنە ءبىر، كەيدە ەكى قۇلىن تۋادى. ادەتتە، جاڭا تۋعان قۇلىن 10-15 مينۋتتان كەيىن اياعىنان تىك تۇرىپ، ءجۇرىپ كەتەدى.

«ءبىزدىڭ كىشكەنتاي زەبرامىزدىڭ بۋىنى قاتايىپ، ءوسىپ كەلەدى. ەندى وعان ەرەكشە ات قويعىمىز كەلەدى. ءوز نۇسقالارىڭىزدى ايتىپ، ۇسىنىستارىڭىزدى پاراقشامىزعا جازىڭىزدار»،-دەپ حابارلادى زووباقتان.

التىن كۇز كەلدى. حايۋاناتتار باعىنىڭ ءار تۇرعىنى جىلدىڭ وسى مەزگىلىن ەرەكشە سەزىنەدى. وڭتۇستىك استانادا اۋا رايى ءالى جىلى بولعاندىقتان، حايۋاناتتار باعىنىڭ كەيبىر تۇرعىندارى كۇنگە قىزدىرىنىپ جاتقاندى جاقسى كورەدى.

مىسالى، كەنگۋرۋ كۇن ساۋلەسى جاقسى تۇسەتىن جەردە جاتادى، از قوزعالۋعا تىرىسادى. زەبرا، جيراف، ءپىل، ارىستان دا سونىڭ قاتارىندا.

زووباقتاعى قۇستار مەن ءتيىن دە الداعى قىس مەزگىلىنە دايىندالۋدا.
تيىندەر قىسقى كورەكتەرىن ىندەرىنە تاسىپ جاتىر.