ال قازا بولعاندار سانى 9%-عا وسكەن.
جول اپاتىنان قازا تاپقاندار سانى رەكوردتىق دەڭگەيگە جەتتى، دەپ حابارلايدى aqshamnews.kz Energyprom.kz-كە سىلتەمە جاساپ.
قازاقستان باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتىنشە، بيىلعى جىلدىڭ قاڭتار-قازان ايلارىندا جول اپاتى سالدارىنان 29،5 مىڭ ادام زارداپ شەككەن. بۇل سيفر ءتىپتى سوڭعى جىلدارداعى جىلدىق كورسەتكىشتەن دە اسىپ ءتۇستى. 2023 جىلدىڭ ون ايىندا اپاتتان زارداپ شەككەندەر ەكى ەسە (14،5 مىڭ ادام) از بولدى.
قاڭتار-قازان ايلارىندا قايتىس بولعاندار سانى دا ءوستى: 2023 جىلدىڭ وسى كەزەڭىندەگى 1،9 مىڭ ادام بولسا، بيىل 2،1 مىڭ ادام. وعان اپاتتىڭ كوبەيىپ كەتۋى سەبەپ.
قازا بولعانداردىڭ كوبى الماتى، تۇركىستان جانە جامبىل وبلىستارىندا: 736 ادام نەمەسە جالپى ءولىم-جىتىمنىڭ 35 پايىزى وسى ايماقتارعا تيەسىلى. ادام ولىمىنە اكەلگەن جول اپاتتارى استانادا از تىركەلدى.
جۇرگىزۋشىلەر جاراقات العان نەمەسە قازا بولعان جول اپاتتارىندا 86% جاعدايدا ەر ادامدار زارداپ شەككەن. كوبىنەسە (79% جاعدايدا) بۇل جاس نەمەسە ورتا جاستاعى ەر ادامدار (18-دەن 49 جاسقا دەيىن). جۇرگىزۋشىلەر زارداپ شەككەن نەمەسە قازا تاپقان جول اپاتتارىنىڭ 3%-ىندا كامەلەتكە تولماعاندار كولىك جۇرگىزگەن.
جاراقات العان نەمەسە قازا تاپقان جولاۋشىلار كوبىنە ايەلدەر (61%) بولدى. جول اپاتتارىنان زارداپ شەككەن جانە قازا تاپقان جولاۋشىلاردىڭ تورتتەن ءبىرى بالالار: بيىلعى جىلدىڭ ون ايىندا – 2،4 مىڭ ادام.
2024 جىلدىڭ قاڭتار-قازان ايلارىندا جۇرگىزۋشىلەر 8،3 مىڭ رەت جاياۋ جۇرگىنشىلەردى قاققان. 34% جاعدايدا بالالار، ال 48% جاعدايدا 18 بەن 49 جاس ارالىعىنداعى ەرەسەكتەر جاراقات الدى نەمەسە قازا بولدى.
ايتپاقشى، جول اپاتىنا 3% جاعدايدا عانا جاياۋ جۇرگىنشى كىنالى. 8% جاعدايدا كىنالىلەر وقيعا ورنىنان قاشىپ كەتەدى. قاڭتار-قازان ايلارىندا 480 ماس جۇرگىزۋشى جول اپاتىن جاساعان. جول اپاتىنا كىنالىلەردىڭ ىشىندە مۇنداي جۇرگىزۋشىلەردىڭ ۇلەسى 2،2%-دى قۇرادى.